Oktyabrın 20-də icra aparatında partiyanın sədr əvəzi Elçin Manafovun, sədrin birinci müavini İnqilab Əhədlinin, sədr müavinləri Rövşən Əhmədovun və Akif Heydərlinin iştirakı ilə toplantı keçirilib. Toplantıda Azərbaycan İslam Partiyasının oktyabrın 10-da Bakı Şəhər İcra Hakimiyyətinə müraciətinə meriyanın oktyabrın 19-da verdiyi cavab müzakirə edilib, bəyanat qəbul olunub.

Akif Heydərlinin “Media forum” saytına verdiyi məlumata görə, Bakı Şəhər İcra Hakimiyyətinin cavab məktubunda deyilir ki, Azərbaycan İslam Partiyasının üzvlərinin iştirakı ilə yaradılmış təşkilat komitəsinin mitinq keçirmək istəyi “Sərbəst toplaşmaq” haqqında qanunun müəyyən maddələrinə cavab vermir: “Məktubda bildirilir ki, təşkilat komitəsinin təklif etdiyi küçə və prospektlər nəqliyyatın intensiv hərəkət etdiyi ərazilər olduğundan həmin yerlərdə aksiya keçirilməsi mümkün deyil. Buna görə də Bakı Şəhər İcra Hakimiyyəti planlaşdırılmış mitinqin keçirilməsini məqsədəmüvafiq hesab etmir”.

Bugünkü toplantıda Bakı Şəhər İcra Hakimiyyətinin 19 oktyabr tarixli məktubuna cavab verilib: “Bizim cavab məktubumuzda “Sərbəst toplaşmaq” haqqında qanunun müəyyən bəndlərinin pozulmadığı bildirilib, aksiyanın mitinq formasında keçirilməsi, onun yeri, vaxtı, iştirak edə biləcək insanların sayı barədə dəqiq məlumat verilib. Həmçinin təşəbbüs qrupuna daxil olan şəxslərin yaşayış ünvanları və sairə məlumatlar məktubda qeyd olunub. Cavab məktubunda bir daha vurğulanıb ki, təşkilat komitəsinin aksiya keçirmək üçün təklif etdiyi yerlər qanunla müəyyən olunmuş ərazilərdir. Həmçinin orada yazılmışdı ki, həmin yerlər müvafiq bilinməsə, təşkilat komitəsi Bakı Şəhər İcra Hakimiyyətinin özünün təklif etdiyi alternativ yerdə də mitinq keçirməyə hazırdır”.

A.Heydərlinin sözlərinə görə, bütün bunlara baxmayaraq Bakı Şəhər İcra Hakimiyyəti təşkilat komitəsinin mitinq keçirmək istəyinə yox cavab verib: “Əlbəttə, biz bunu ilk növbədə ölkə vətəndaşlarının konstitusion hüquqlarının pozulması kimi qiymətləndirir və Bakı Şəhər İcra Hakimiyyətinin həmin qanunu kobud şəkildə pozması kimi dəyərləndiririk. Biz mitinqin məqsədini aydın göstərmişik, meriyanın reaksiyasını başa düşülməyən hal kimi qiymətləndiririk. Bakı Şəhər İcra Hakimiyyəti xalqını sevən, vətənpərvər, vətən torpaqlarının bütövlüyünü istəyən, ölkədə korrupsiya və rüşvətxorluq kimi ölkə taleyini zərbə altında qoyan əlamətlərə qarşı mübarizəyə yox deyir. Əgər belədirsə, ölkə vətəndaşları Bakı Şəhər İcra Hakimiyyəti ilə artıq razılaşdırılmış deyil, razılaşdırılmamış mitinq keçirmək fikrinə düşsünlər. Bu zaman isə müəyyən təxribatlar törədilsin, insanlar təzyiqə və təsirə məruz qalsın”.

Toplantının son qərarı haqqında danışan A.Heydərli əlavə edib ki, təşkilat komitəsi məhkəmə yolu ilə öz konstitusion hüquqlarının bərpasına çalışacaq: “Yaxın müddətdə aidiyyəti üzrə məhkəmələrə müraciət edəcəyik və Bakı Şəhər İcra Hakimiyyətinin qanunsuz hərəkətlərinə son qoyulması üçün mübarizəmizi davam etdirəcəyik”. (faktxeber.com)