Fransa prezidenti Nikola Sarkozinin Ermənistanda qondarma erməni soyıqırmı ilə bağlı verdiyi bəyanatla əlaqədar Türkiyənin xarici işlər naziri Əhməd Davudoğlu sərt açıqlama verib.

"Anadolu" agentliyinin verdiyi xəbərə görə, Ə.Davudoğlu deyib: "Tarixlə üzləşməyi bizə tövsiyə edənlər, əvvəlcə özləri güzgüyə baxsınlar".

Davudoğlu Sarkozinin bəyanatı ilə əlaqədar söyləyib: "Belə beyanatların siyasi oportunizm olduğunu düşünürəm. Təəssüf ki, Avropada nə vaxt seçkilər yaxınlaşsa, belə siyasi oportunizmlərə tez-tez rast gəlinir. Bu bəyanatın indi verilməsi, Fransanın daxili siyasəti ilə əlaqədardır. Bu bəyanat həqiqətə uyğun deyil".

O, bu açıqlamanın Türkiyə və Ermənistan arasında başlayan və asta-asta irəliləyən müzakirə müddətinə mənfi təsir göstərəcəyini bildirib: "Biz tariximizlə üzləşərik, ancaq bizim tariximiz eyni zamanda türklərlə ermənilərin əsrlərlə bir yerdə yaşadığı tarixidir. Biz hər zaman tariximizlə üzləşdik. Tarixlə üzləşməyi bizə tövsiyə edənlər, əvvəlcə özləri güzgüyə baxsınlar".