Xəbər verdiyimiz kimi, iyulun 17-də Şimali İraq Kürd Administrasiyasının mərkəzi Ərbil şəhərində terror aktı baş verib. Bir restorana təşkil olunan hücum nəticəsində iki nəfər dünyasını dəyişib, ölənlərdən biri Türkiyənin Ərbil Konsulluğunun əməkdaşı – konsul müavinidir. İraq kürd administrasiyasının məlumatında iki nəfərin öldüyü, onlardan birinin türkiyəli diplomat olduğu qeyd edilib.

Xarici işlər naziri Mövlud Çavuşoğlu restorana 3 nəfər silahlı şəxsin hücum etdiyini, hazırda Ərbil və Bağdadla təmasların davam etdiyini bildirib. Nazir deyib ki, ilkin bilgilərə görə silahlılar türk diplomatla yanaşı masada əyləşmiş iki iraqlının hücuma məruz qalıb və onların biri ölüb, ikincisi isə ağır yaralanıb. Bu səbəbdən də Çavuşoğlu terror hücumunun PKK tərəfindən törədilməsi ehtimalı ilə yanaşı məhz yan masadakı şəxslərə qarşı törədilmiş terror hadisəsi ola biləcəyini qeyd edib.

Ərbil polisinin məlumatına görə, restorana hücum nəticəsində iki nəfər ölüb, bir nəfər isə ağır yaralanıb. Hazırda axtarışlar davam edir. Türkiyə prezidenti. Dövlət rəsmiləri hadisəni pisləyib. Eyni zamanda Avropa İttifaqı, həmçinin ABŞ, eləcə də Bağdad hökuməti hücumu pisləyən açıqlama yayıb.

Qeyd edək ki, Türkiyənin xarici ölkələrdə fəaliyyət göstərən diplomatları ötən əsrin 70 və 80-ci illərində erməni terror təşkilatlarının hücumlarına məruz qalıb. Ümumilikdə 4 qitədə Türkiyənin diplomatına qarşı 27 sui-qəsd təşkil olunub və bu hadisələr nəticəsində 34 türkiyəli diplomat öldürülüb, onlarla diplomat isə yaralanıb. Sonuncu dəfə türkiyəli diplomat 1994-cü ildə Türkiyənin Afina səfirliyinin məsləhətçisi Ömər Haluk Sipahioğlu olub.

Hələlik terror hücumunun hansı qrup tərəfindən törədildiyi bilinməsə də, ilk ehtimal PKK üzərinə cəmləşib. Məlum olduğu kimi. son 3 ildir ki, Türkiyə hökuməti həm ölkənin cənub-şərq regionlarında, o cümlədən İraqın şimalında yerləşən PKK düşərgələrinə, əsasən da Sincar dağı və Qəndil yaylası düşərgələrinə əməliyyatlar keçirir.

Bu ilin yazında isə Türkiyə ordusu İraqın şimal regionlarında PKK terrorçularına qarşı quru qüvvələrinin də iştirak etdiyi “Pəncə” əməliyyatı başladıb. İyulun 12-də isə Türkiyə ordusu Türkiyə Quru Qoşunları və Hərbi Hava Qüvvələrinin dəstəyi ilə “Pəncə-2” əməliyyatına başlayıb. Bu əməliyyat İraqın Hakurk bölgəsində terror təşkilatlarının istifadə etdiyi mağara və gizli sığınacaqların məhv edilməsi və terrorçuların məhv edilməsini nəzərdə tutur.

Xatırladaq ki, “Pəncə-1” əməliyyatı mayın 27-də başlayıb. Hər iki əməliyyat nəticəsində İraqın şimalında Türkiyə ordusu tərəfindən 71 PKK terrorçusu məhv edilib. Ümumilikdə isə Türkiyə ordusunun İraqın şimalında keçirdiyi antiterror əməliyyatları nəticəsində 174 terrorçu zərərsizləşdirilib.

Bu səbəbdən də Türkiyə mediası ilk versiya kimi PKK-nın qisas əməliyyatı ehtimalını gündəmə gətirib. Ancaq Ərbil hökumətinin buna razılıq verməsi real deyil. Bu cür hadisə PKK-nın həm də İraq kürd administrasiyasına qarşı savaş açması demək olar. Bu mənada Ərbil hücumunun PKK şübhəsi ilə yanaşı digər versiyaları da aktuallaşdırır. O da ehtimal olunur ki, başqa qruplar da bu hadisəni Türkiyədən qisas almaq qəsdi ilə törədə bilər.

Kənan Rövşənoğlu,

Musavat.com