Səudiyə Ərəbistanının İstanbul baş konsulluğunda öldürülən jurnalist Camal Qaşıqçı cinayəti ilə bağlı beynəlxalq reaksiyalar səngimir.

Islam.az musavat.com-a istinadən xəbər verir ki, qətl edilən jurnalistin nişanlısı Xədicə Cengiz İsveçrədə BMT İnsan Hüquqları Şurasının 41-ci sessiyasında çıxış edib.

“Mənim adım Xədicə Cengizdir. Sizə buraya bir qurban olaraq xitab edirəm”,- deyə o, nişanlısının vəhşiliklə öldürüldüyünü qurum üzvlərinə çatdırıb.

BMT-nin məhkəməsiz icralar üzrə xüsusi məruzəçisi Anyes Kalamarın keçən həftə açıqladığı raportla bağlı gözləntilərini dilə gətirən Cengiz deyib: “Hər şeydən öncə sənəd beynəlxalq təhqiqatın aparılmasının vacibliyini ortaya qoyub. BMT baş katibi Kalamarın istintaqın həyata keçirilməsi yönündə üzv dövlətlərlə əməkdaşlıq etməlidir”.

Camal Qaşıqçının öldürülmə əmrinin kim tərəfindən verildiyini bilmək istədiyini vurğulayan X.Cengiz əlavə edib: “Heç olmasa onun cəsədini harda olduğunu bilmək istəyirəm. Sizdən buna görə hərəkətə keçməyinizi xahiş edirəm.. Kalamarın da söylədiyi kimi, artıq sanksiyaların vaxtı gəlib. Cinayətin arxasındakı şəxslər və bunun üstünü örtməyə çalışanlar layiq olduqları cəzanı almalıdırlar”.

“Tarix həqiqətə sadiq qalanları və olmayanları qeyd edəcək”,-deyərək mərhum jurnalistin nişanlısı cinayətin aydınlaşdırılması üçün hər kəsi yardım göstərməli olduğunu vurğulayıb.

Qeyd olunur ki, Camal Qaşıqçı cinayəti ilə əalqədar açıqlanan raportla bağlı "Anadolu" agenltiyinə müshaibə verən Anyes Kalamar bu məsələnin beynəlxalq cinayətdən daha böyük bir iş olduğunu deyib. Onun sözlərinə görə, cinayət beynəlxalq münasibətlərə böyük ziyan vurub. Bu səbəbdən BMT-nin onu ciddiyə alması lazımdır.