Mustafa Cəmilov deyib ki, hazırda radikal müsəlman icmaları Krım tatar xalqı üçün mürəkkəb problemlər yaratmağa başlayırlar. Ukrayna Ali Radasının deputatı, Krım tatar məclisinin (qeyri-rəsmi milli parlamentin) sədri Mustafa Cəmilov yarımadada radikal müsəlman icmalarının peyda olduğunu bildirib.

Bu gün Krım tatar xalqının beşinci qurultayında çıxış edən Cəmilov bildirib ki, hazırda radikal müsəlman icmaları Krım tatar xalqı üçün mürəkkəb problemlər yaratmağa başlayırlar. Onun fikrincə, bu cür icmalar Krım tatar xalqının birliyini pozur və onun deportasiya olunmuş xalq kimi hüquqlarının bərpasına mane olur.

Mustafa Cəmilovun fikrincə, yalnız vahid islam dövlətində yaşamağa çağıran bu cür təriqətlər gəncliyi demokratik seçkilərdə iştirak etməməyə və hansısa uydurma islam xilafəti uğrunda mübarizəyə çağırmaqla tatarları öz tarixi vətənlərinin siyasi proseslərinə inteqrasiyasından kənarda qoyurlar. Həmçinin radikallar müqəddəs islam dininin digər toplumlardan təcrid edirlər.

Qeyd edək ki, bu ilin avqust ayının 10-a Krım muxtar respublikasının mərkəzi Simferopol şəhərində beynəlxalq dini hərəkat olan "Hizbut təhrir" təşkilatı konfrans keçirib. Bu qurum dünyanın bir çox ölkələrində terrorçu təşkilat kimi tanındığına görə, fəaliyəti qadağan olunub. Bu təşkilat şəhidizm cərəyanını dəstəkləyir və dünya islam xilafətinin qurulması uğrunda mübarizə apardığını bəyan edir. Təşkilatın kosmopolit düşüncəsi turançı kimi tanınan Mustafa Cəmilovun və Krım tatar istiqlalçılarının düşüncələri ilə uyğun gəlmir.

Xatırladaq ki, M.Cəmilov Azərbaycanın azadlıq hərəkatı zamanı Bakıda dəfələrlə olub və Azərbaycan toplumuna yaxından tanışdır.