Yeni partiya yaratmaq ərəfəsində olan Türkiyənin sabiq Baş naziri Əhməd Davutoğlu Ankarada keçmiş AKP-li nazirlər və millət vəkillərinin iştirak etdiyi iftar məclisində çıxış edərək, hazırki iqtidarı başda Rəcəb Tayyib Ərdoğan olmaqla tənqid atəşinə tutub.

İslam.az-ın Türkiyə mətbuatına istinadla verdiyi xəbərə görə, siyasətçi ölkədəki vəziyyətə toxunaraq “qınınızdan çıxın, qorxmadan sözünüzü deyin” söyləyib: “Hamımız soyuqqanlı tərzdə danışmalıyıq. Bundan çəkinməməliyik. Fərqli söz söyləyən kimliyindən asılı olmayaraq xəyanət və ya başqa cinayətlərdə ittiham edilməməlidir. Bu əks fikirlərə cavab vermək lazımdır. Üç ildir belə ittihamlara tuş gələn insan kimi söyləyə bilərəm: belə ittihamlardan qorxan şəxslər düşünməyi unudurlar, əxlaqı unudurlar, ən başlıcası isə, insan olmağı unudurlar”.

Zəruri haşiyə. Bu yerdə İmam Əlinin (ə) hər dövr və hər ictimai quruluş üçün əbədi aktuallığını itirmiyəcək kəlamı xatırlamaq yerinə düşərdi: “İman (nişanəsi) budur ki, sənin ziyanına olsa belə doğru danışmağı, xeyrinə olsa da yalan danışmaqdan üstün tutasan.” (Nəhcül-Bəlağə, hikmət 458).

Davutoğlu Türkiyədə ədalətin yenidən bərqərar olmasının labüdlüyünü vurğulayıb və amerikalı rahib Bransonla əlaqədar ABŞ və Türkiyə arasında meydana gələn gərginliyi xatırladıb: “Branson məsələsində beynəlxalq aləmdə itirdiyimiz etibar məni son dərəcə üzdü. Baxmayaraq ki, mən vəzifə başında deyildim. Niyə məyus etdi? Əgər iddia olunduğu kimi Branson cinayət törətmişdirsə, o zaman nə olursa olsun onu buraxmaq olmazdı. Yox, əgər bir günahı yox idisə, kim olursa olsun, o, həbs edilməməliydi”.

Xatırladaq ki, amerikalı din xadimi Endryu Branson 2016-cı ilin noyabrında Türkiyə dövlətinə qarşı cinayətlərdə ittiham edilərək həbs edilmişdi. Bu hadisə Türkiyə-ABŞ münasibətlərində ciddi gərginliyə səbəb olmuşdur və hətta ABŞ-ın Türkiyəyə qarşı bir sıra iqtisadi sanksiyalarına gətirib çıxarmışdı. Birləşmiş Ştatların təzyiqi nəticəsində 2018-ci ilin oktyabrında rahib Branson azad edilib.