Oxucu sual verir: Cənazəni qəbrə qoyarkən başı üzərində oxunan sözlərdə nə deyilir və bu ayini yerinə yetirmək vacibdirmi?

Şiə məzhəbinə görə, dəfn zamanı ənənəvi olaraq yerinə yetirilən dini ayinlərdən biri də budur ki, cənazə qəbrə qoyulduqdan sonra mərhumun yaxın qohumlarından biri qəbrin içinə düşür, əlini cənazənin çiyninə qoyub onu astaca tərpədir. Bu zaman ya özü, ya da başqası (molla) "təlqin" adlı sözləri oxuyur. Əhli-sünnə məzhəbinə görə isə, cənazə qəbrə qoyulub üstü torpaqlandıqdan sonra əməlisaleh bir şəxs tərəfindən bu edilə bilər. Təlqində cənazənin ruhuna xitab edilir, hətta bir neçə yerdə “ey filankəsin oğlu (qızı) filankəs” deyə adı və atasının adı çəkilir. Onun mətnində İslamın əsasları bir daha sadalanır, ölünün Rəbbi, peyğəmbəri, qibləsi, Müqəddəs Kitabı onun yadına salınır (şiə məzhəbində imamların adları da bir-bir sadalanır). Məqsəd budur ki, sorğu-sual mələkləri (Münkər və Nəkir) qəbrə daxil olub mərhumu suala tutanda, verməli olduğu cavablar yadından çıxmasın.

Təlqin dəfnin vacib əməllərindən deyil. Cəfəri, şafii və hənbəli məzhəblərində bu, müstəhəbdir (sünnətdir). Malikilər yalnız insan can verərkən təlqin oxunmasını icazəli bilirlər, dəfn zamanı təlqin oxumağı isə məkruh sayırlar. Hənəfilərin fikrincə, təlqin oxutdurmaq və ya oxutdurmamaq ölü sahibinin öz ixtiyarına buraxılan bir məsələdir.