Oxucu sual verir: Zöhr namazını qılarkən ikinci rükətdə təşəhhüddən sonra üçüncü rükət üçün qalxmaq əvəzinə, adam səhvən salamları deyirsə, sonra bunu anlayırsa, nə etməlidir?

Namazların hər birinin bəlli rükət sayları vardır və hər namaz öz rükət sayına uyğun şəkildə qılınmalıdır. Dörd rükətli zöhr namazını qılan şəxs ikinci rükətdə təşəhhüdü söylədikdən sonra ayağa qalxıb üçüncü rükətin qiraətini oxumalıdır. Əgər səhvən, avtomatik olaraq təşəhhüddən sonra salamları söyləməyə başlasa, istər salamları bitirməzdən qabaq, istərsə də salamları söyləyib qurtardıqdan sonra, amma qiblədən dönməzdən əvvəl bunu anlasa, səhv səcdəsi adlı əməl ilə bu səhvi düzəldə bilər. Səhv səcdəsi namazda yol verilən bəzi səhvləri, o cümlədən, artıq deyilmiş salamları düzəltmək üçün nəzərdə tutulub. Səhv səcdəsinin qaydası budur ki, qeyd edilən halda, qiblədən dönməmək şərti ilə iki dəfə adi qaydada səcdə edilsin. Bu səcdələrdə hər hansı zikri söyləmək olar, müstəhəb zikr isə risalədə qeyd edilib. İki səcdədən sonra təşəhhüd oxunur və “əssəlamu əleykum və rəhmətullahi və bərəkatuh” salamını söyləməklə bitir. Göstərilən şərtlər daxilində səhv səcdəsini yerinə yetirdikdən sonra namazda yol verilmiş səhv düzəldilmiş sayılır və namaz düzgün hesab edilir.