Vəhabilər Qafqazda vəziyyətin sabitliyini pozmaq, sonra isə Şimali və Cənubi Qafqaz ərazisində dini-fundamentalist dövlət yaratmağa çalışırlar.

AzərTac xəbər verir ki, bu sözləri sentyabrın 21-22-də Rusiyanın Yekaterinburq şəhərində təhlükəsizlik məsələlərinə cavabdeh olan yüksək vəzifəli şəxslərin beynəlxalq görüşü zamanı Azərbaycanın Prezidenti Administrasiyasının rəhbəri Ramiz Mehdiyev çıxışa zamanı bildirib.

O deyib ki, dini xarakterli bir sıra ekstremist qruplar, məsələn, radikal vəhhabi təşkilatları özlərinin qanunsuz fəaliyyətini qonşu ölkələrin ərazisində, o cümlədən Rusiya Federasiyasının Şimali Qafqaz regionunda da həyata keçirilər. Onlar Qafqazda vəziyyətin sabitliyini pozmağa, sonradan Şimali və Cənubi Qafqaz ərazisində dini-fundamentalist dövlət yaratmağa çalışırlar. Bununla əlaqədar xüsusi vurğulamaq istəyirəm ki, bizim hüquq mühafizə orqanları rusiyalı həmkarları ilə səmərəli əməkdaşlıq qurmuşlar və bu əməkdaşlıq dini ekstremizmə qarşı mübarizə işində müsbət nəticələr verir.

R.Mehdiyev dini ekstremistlərin fəaliyyəti nəticəsində yaranan təhlükəni artıra biləcək bəzi risk amillərini də qeyd edib.

O, bildirib ki, son illərdə Pakistanda Şimali Vəziristan ərazisində “Əl-Qaidə” düşərgələrində hazırlıq keçmiş qanunsuz silahlı dəstənin üzvləri məhkum edilib, “Sumqayıt camaatı” terror qrupu zərərsizləşdirilib. Bundan əlavə, dini təmayüllü “Ceyşulla”, “Hizbut-Təhrir”, “Əl-Qaidə Qafqaz”, “İmam Mehdinin şimal ordusu” və başqa terror təşkilatlarının özəkləri ləğv olunub, həmin təşkilatların 189 üzvü cinayət məsuliyyətinə cəlb edilib.

PA-nın rəhbəri həmçinin Azərbaycan İslam Partiyasının fəaliyyətinə toxunaraq bu partiya ilə əlaqədar şəriət qanunları ilə idarə olunan dövlət yaratmağa açıq çağırışlar edən dini icmaların üzvlərinin həbsini də qeyd edib. O, bu təşkilatın üzvləri həbs edilərkən onlardan silah və sursat götürüldüyünü, hazırda onların fəaliyyətinin diqqətlə araşdırdığını bildirib.

Xatırladaq ki, dünyanın 65 ölkəsindən nümayəndələrin iştirak etdiyi beynəlxalq görüşdə PA rəhbəri Ramiz Mehdiyev başçılığı ilə Administrasiyanın şöbə müdirləri Fuad Ələsgərov, Novruz Məmmədov və Elnur Aslanovdan ibarət nümayəndə heyəti təmsil edib.