Qafqaz Müsəlmanları İdarəsinin (QMİ) sədri şeyxülislam Allahşükür Paşazadə Səudiyyə Ərəbistanı Krallığının İslam, vəqflər, dəvət və irşad işləri nazirinin müavini Əbdüləziz ibn Abdullah əl-Əmmarın rəhbərlik etdiyi nümayəndə heyəti ilə görüşüb.

QMİ-nin mətbuat xidmətindən SalamNews-a verilən məlumata görə, A.Paşazadə ölkələrimiz arasında əlaqələrin yüksək səviyyədə olduğunu məmnunluqla bildirib. Bu yaxınlarda Səudiyyə Ərəbistanına səfəri çərçivəsində keçirilmiş görüşlər barədə danışan A.Paşazadə deyib ki, həm dini, həm də siyasi əlaqələrin güclənməsi dövlətlər arasında qarşılıqlı əlaqələrin inkişafına təkan verir.

Azərbaycanda dinə, milli mənəvi dəyərlərə yüksək qiymət verildiyini vurğulayan A.Paşazadə ölkədə vaxtilə 18 məscidin fəaliyyət göstərdiyini, indi isə bunların sayının 800-dən çox olduğunu diqqətə çatdırıb, yeni məscid binalarının tikildiyini, yenidənqurma işlərinin aparıldığını diqqətə çatdırıb.

Nazir müavini Əbdüləziz ibn Abdullah əl-Əmmar ölkəsi ilə Azərbaycan arasında dost və qardaş münasibətlərin olmasından məmnunluğunu söyləyib. QMİ ilə təmsil etdiyi nazirlik arasında əməkdaşlıq əlaqələrindən danışan qonaq İslam əlyazmaları ilə bağlı dəqiq araşdırmaların aparılmasının vacibliyini bildirib.

Əbdüləziz ibn Abdullah əl-Əmmar Səudiyyə Ərəbistanının Ermənistan-Azərbaycan Dağlıq Qarabağ münaqişəsinə münasibətinin birmənalı və dəyişməz olduğunu, ölkəsinin Azərbaycanın ərazi bütövlüyünü daim dəstəklədiyini xatırladıb.

Görüşdə iki ölkə arasında əlaqələrin uğurla inkişaf etdiyi vurğulanıb, dinlərarası münasibətlər və digər aktual məsələlər müzakirə olunub.