Türkiyənin Baş naziri Rəcəb Tayyib Ərdoğan Misirə səfəri zamanı "Artıq inanmıram" deyərək əlaqələri kəsdiyi Suriyanın dövlət başçısı Bəşər Əsədə qarşı ilk sanksiyanın tətbiqinə başlayıb. Belə ki, Türkiyə Suriyaya hərbi yük daşıyan təyyarələr üçün hava məkanını bağlayıb.

SalamNews-un “Doğan”a istinadən verdiyi xəbərə görə, Ərdoğan ABŞ prezidenti Obama ilə görüşündən sonra təşkil etdiyi mətbuat konfransında ABŞ ilə Türkiyənin Suriyaya qarşı ortaq sanksiyalar tətbiq etməyi planladığını söyləyib.

Ərdoğan Suriyaya tətbiq ediləcək sanksiyalarla bağlı deyib: "Suriya ilə əlaqədar başlanmış sanksiyalar var. Bizim sanksiyalarımız barədə xarici işlər nazirləri müştərək işləyəcəklər. Suriyadakı sanksiyalar Liviyadaki kimi olmaya bilər. Hər cür sanksiya ölkəsinə, insanına, demoqrafik quruluşuna görə müxtəlif olacaq. Suriyaya tətbiq edilənlər daha fərqli olacaq. Bizim bununla bağlı bəzi fikirlərimiz var, amma xarici işlər nazirlərimizin təkliflərindən sonra addım atacağıq”.