Oxucu sual verir: "Rəhman" surəsində Allah iki şərqin və iki qərbin Rəbbi adlandırılır. Bunun izahı nədir?

"Rəhman" surəsinin 17-ci ayəsində Allah-Taala Özü haqqında buyurur: “İki məşriqin və iki məğribin Rəbbi Odur”. Bu ayənin izahı barədə keçmişdə və müasir dövrdə fərqli nəzəriyyələr irəli sürülmüşdür. Bəzi alimlər burada Günəşin və Ayın doğduğu və batdığı istiqamətlərdən danışıldığını deyirlər. Bəzi alimlərin fikrincə, Allah-Taala burada Yerin iki yarımkürəsinin hərəsi üçün ayrıca günçıxan və günbatan qeyd edir. Amma daha düzgün və əsaslı nəzəriyyə budur ki, göstərilən ayədə Günəşin Yerə nisbətən tutduğu 4 mühüm vəziyyət nəzərdə tutulur. Belə ki, il ərzində iki dəfə gecə ilə gündüzün bərabərləşməsi baş verir, bir dəfə ən uzun gündüz, bir dəfə də ən uzun gecə müşahidə edilir. Gecə ilə gündüz Günəşin çıxması və batması arasındakı müddətlə ölçülür. Buna görə də Allah-Taala ehtimal ki, bu dörd hadisəni 2 günçıxan və 2 günbatan kimi təqdim etmişdir.