Türkiyənin müdafiə naziri İsmət Yılmaz bəyan edib ki, İsrail rejimilə münasibətlərin korlanmasından sonra oradan alınan pilotsuz kəşfiyyat təyyarələri Britaniya istehsalı olan texnika ilə əvəzlənəcək.

Nazir İsrail rejiminin Türkiyə ilə bağlanmış müqavilənin həyata keçirilməsini ləngidərək “Heron” tipli pilotsuz kəşfiyyat təyyarələrinin yığılıb göndərilməsini ləngitdiyini bildirib.

O deyib ki, Türkiyə artıq İsrail rejimindən bu təyyarələri almayacaq: “Biz Britaniya istehsalı olan ”Phoenix" pilotsuz təyyarələrini alacağıq. Onlar “Heron”lardan daha yaxşıdır". İsrail rejiminin vaxtilə Türkiyəyə satdığı “Heron”lar təmir üçün geri qaytarılsa da onların təhvil verilməsi ləngiyir. Türkiyə ordusu pilotsuz kəşfiyyat təyyarələrindən son bir neçə ildə ölkənin cənub-şərq bölgələrində və İraqın şimalında PKK-ya qarşı əməliyyatlarda istifadə edirdi.
“Phoenix” pilotsuz təyyarələrini isə Britaniyanın BAE şirkəti istehsal edir. Onların vəzifəsi artilleriya batareyalarının vuracağı hədəflərin koordinatlarını müəyyən edib komanda mərkəzinə ötürməkdir. Bu təyyarələr məhdud formada Kosovo və İraqda tətbiq edilib. “Phoenix” təyyarələrinin 2013-cü ilədək silahlı qüvvələrin sərəncamında qalması nəzərdə tutulurdu, lakin Britaniya ordusu daha yaxşı texnika tələb edib və nəticədə bu təyyarələr 2006-cı ildə istismardan çıxarılıb. Hazırda Britaniya ordusu pilotsuz kəşfiyyat təyyarələrini İsrail rejimindən alır.
Qeyd edək ki, bu günlərdə Türkiyə mənbələrində İsrail rejimilə münasibətlərin korlanmasından sonra pilotsuz təyyarələrin Azərbaycandan alına biləcəyi haqda xəbər yayılmışdı. Belə ki, Azərbaycan ötən ildən başlayaraq pilotsuz kəşfiyyat təyyarələrinin iki tipinin istehsalına başlayıb. Bu texnika İsrail rejiminin Kosmik Sənaye Şirkəti ilə birgə Bakıda qurulmuş “Azad Systems Co.» müəssisəsində yığılır. Həmin zavodda ”Orbiter" adlı pilotsuz kəşfiyyat təyyarələri istehsal olunur. Müdafiə Sənayesi Nazirliyi təyyarələrin bir hissəsini xaricə satmaq niyyətindədir. Bakıda yığılan təyyarələr silah sistemləri ilə təchiz olunmayıb və ancaq kəşfiyyat məqsədli videoçəkilişlər apara bilir. Lakin Bakıda yığılan təyyarələrin Türkiyəyə satılmasının nə dərəcədə mümkün ola biləcəyi isə açıq qalırdı. Çünki texnologiya və zəruri hissələr İsrail rejimindən alındığı üçün Təl-Əviv onların Türkiyəyə satılmasına etiraz edə bilərdi. Çox güman ki, Türkiyə tərəfi bu nüansı nəzərə alaraq pilotsuz kəşfiyyat təyyarələrinin Britaniyadan alınmasına üstünlük verib.(musavat.com)