Bu gün Bakı Ağır Cinayətlərə dair işlər üzrə Məhkəməsində Azərbaycan İslam Partiyasının (AİP) sədri Hacı Mövsüm Səmədov, onunla yanaşı - AİP sədrinin müavini Vaqif Abdullayev, Astara rayon təşkilatının sədri Rufulla Axundzadə, Mövsüm Səmədovun qayını Firdovsi Məmmədrzayev, əmisi oğlu Dəyanət Səmədov, Masallı ruhanisi Seyyid Fəramiz Abbasov cinayət işi üzrə növbəti məhkəmə iclası keçirilir.

SalamNews xəbər verir ki, hazırda məhkəmədə hal şahidlərinin və digər şahidlərin dindirilmə prosesi gedir. Bundan əvvəl, Hacı Mövsüm Səmədov, Firdovsi Məmmədrzayev, Dəyanət Səmədov, Fəramiz Abbasov və Rufulla Axundzadənin işi ilə bağlı şahidlər ifadə verib. Bu gün AİP sədrinin müavini Vaqif Abdullayevin işi üzrə şahidlərin dindirilməsi gözlənilir.

Xatırladaq ki, Mövsüm Səmədov bu il yanvarın 7–də saxlanılaraq barəsində 13 sutkalıq inzibati həbs seçilib. Nəsimi rayon məhkəməsi tərəfindən yanvarın 20-də isə M.Səmədov barəsində 3 aylıq həbs qətimkan tədbiri seçılıb və Azərbacan Respublikası Baş Prokuroluğunun ağır cinayətlərə dair işlər idarəsində istintaqa başlanılıb. AİP sədri hakimiyyəti zorla ələ keçirmə cəhdində və ya onu zorla saxlama, qanunsuz olaraq odlu silahdan və ya silah qismində istifadə olunan vasitələrdən istifadə etməklə cinayətə hazırlıqda ittiham olunur.