Gürcüstan Müsəlmanları İdarəsinin əleyhinə indiyə qədər 30 mindən çox imza toplanıb. Qafqaz Müsəlmanları İdarəsinin Gürcüstan nümayəndəliyinin rəhbəri Əli Əliyev sentyabrın 16-da “Media forum” saytına açıqlamasında deyib ki, həmin imza kampaniyasına qarışacaqları yoxdur: “İmzaların toplanmasını vətəndaşlar təşkil edib. Nə biz, nə də hər hansı ruhani belə bir addım atıb. İmza atan şəxslər arasında namaz qılan da var, namaz qılmayan da. Kampaniya davam edir”.

Bu il uyun ayında Gürcüstan Müsəlmanları İdarəsi yaradılıb. İyunun 12-də Camal Paksadze baş müfti, Vaqif Əkbərov şeyx, əvvəllər Əli Əliyevin müavini olmuş Yasir Əliyev isə imam seçilib. Bu qurum qeyri-hökumət təşkilatı kimi Gürcüstanda dövlət qeydiyyatına alınıb.

Qafqaz Müsəlmanları İdarəsinin Gürcüstandakı nümayəndəliyinin rəhbərinin sözlərinə görə, müraciətdə Gürcüstan Müsəlmanları İdarəsinə etiraz yer alıb: “Həm də qurumun keçirdiyi seçkiyə mənfi münasibət bildirilib. Müraciət prezident Mixail Saakaşviliyə ünvanlanıb. Gürcüstan Müsəlmanları İdarəsinin təsisçilərinin heç biri ruhani deyil, dövlət adamlarıdır. Eyni zamanda qurumun rəhbərliyindəki adamlar özləri özlərini təyin ediblər, heç bir seçki keçirilməyib. Bu seçkidə Gürcüstanda yaşayan hörmətli din alimləri, ruhanilər iştirak etməyiblər”.

Əli Əliyev qeyd edir ki, Gürcüstan müsəlmanlarının 90 faizindən çoxu Allahşükür Paşazadənin rəhbərlik etdiyi qurumun nəzarəti altında olmaq istəyir: “Tarixən camaat bu idarəyə bağlı olub. Bu bağı qırmaq mümkünsüzdür. 200 il tarixi olan Qafqaz Müsəlmanları İdarəsini qəlblərdən silmək mümkün olan iş deyil. Gürcüstan Müsəlmanları İdarəsini az bir qisim dəstəkləyir. Əksəriyyət Qafqaz Müsəlmanları İdarəsinin tərəfdarıdır”.

Nümayəndəliyin rəhbəri hesab edir ki, Gürcüstan Müsəlmanları İdarəsi adlı təşkilatın bünövrəsi düzgün qurulmayıb: “Onlar düzgün istiqamətlənməyib və qısa müddətdə fəaliyyətləri bitəcək”.

Əli Əliyev 15 ildir Qafqaz Müsəlmanları İdarəsinin Gürcüstan üzrə nümayəndəsi olduğunu qeyd edib: “Biz dövlət, yaxud gürcü ictimaiyyəti tərəfindən hansısa problemlə rastlaşmamışıq. İndiyə qədər öz ibadətimizi, oz dini ayinlərimizi rahat şəkildə yerinə yetirmişik”.

Gürcüstanda 300-ə qədər məscidin fəaliyyət göstərdiyini deyən Əli Əliyev son 15 ildə 30 məscid tikildiyini vurğulayıb: “Bu 15 ildə Gürcüstanda tikilən hər yeni məscidin açılışında Vaqif Əkbərov da olub. Qafqaz Müsəlmanları İdarəsinin nümayəndəliyi açılandan nə işlər görüldüyünü yaxşı bilir”.

Əli Əliyev hazırda hansı məscidin Qafqaz Müsəlmanları İdarəsini dəstəklədiyini, hansı məscidin Gürcüstan Müsəlmanları İdarəsini tanıdığını deməyin çətin olduğunu bildirib: “Bununla bağlı nə sorğu keçirmişik, nə də rəy öyrənmişik”.

Qafqaz Müsəlmanları İdarəsinin ünvanına səslənən ittihamları əsassız adlandıran Əli Əliyev deyib: “Şeyx həzrətləri gəlib burada məscid tikintisi, yaxud təmiri ilə məşğul ola bilməz axı. Hansı kənd məscidinin olmasını istəyirsə, bununla camaat özü məşğul olmalıdır. Ya yenisini tikdirməli, ya da köhnəni təmir etdirməlidir. Azərbaycanda da, dünyanın hər bir yerində də bu cürdür”.

Əli Əliyev keçmiş müavini Yasir Əliyevin Gürcüstan Müsəlmanları İdarəsində çalışdığını, amma onun yerinə indiyə kimi heç bir təyinat olmadığını deyib: “Bu yaxınlarda Qafqaz Müsəlmanları İdarəsi məsələni nizama salacaq. Hər şey öz yerin tapacaq”.


"Media forum"