Gürcüstan Müsəlmanları İdarəsi iyul ayında rəsmi dövlət qeydiyyatına alınıb. İdarənin şeyxi Vaqif Əkbərov sentyabrın 16-da “Media forum” saytına deyib ki, qurum qeydiyyatdan keçdikdən sonra xeyli işə imza atıblar. Şeyxin sözlərinə görə, artıq onun din xadimi olduğu “Cümə” məscidi də (Tbilisidə yerləşir) dövlət qeydiyyatına alınıb və sentyabrın 27-də sənədlərin təqdimetmə mərasimi keçiriləcək: “İndiyə qədər Gürcüstanda məscidlərin reyestri aparılmamışdı. Bu bir ilkdir və ilk qeydiyyata alınan da “Cümə” məscididir”.

Gürcüstan Müsəlmanları İdarəsi iyunun 12-də yaradılıb və rəhbərliyi seçilib. Baş müfti postunu Camal Paksadze, baş şeyx postunu Vaqif Əkbərov, baş imam postunu Yasir Əliyev tutub. Lakin bu qurumun yaradılması Qafqaz Müsəlmanları İdarəsini narazı salıb. Qafqaz Müsəlmanları İdarəsi bu qurumun yaradılmasını separatçılıq, Gürcüstandakı müsəlmanların bölünməsi kimi dəyərləndirib. Hazırda qurumun qeydiyyatının ləğv edilməsi üçün prezident Mixail Saakaşviliyə müraciət hazırlanıb və imza kampaniyası aparılır

Vaqif Əkbərov bu kimi kampaniyalara fikir vermək istəmədiyini, belə işlərin mənasız olduğunu deyib: “O imza toplayanlar da mənim qardaşlarımdır. Lakin biz Gürcüstanda hansısa başqa dövlətin siyasətinin hökmranlıq eləməsinə imkan vermərik. Dindardırsa, ruhanidirsə, dərs keçmək istəyirsə, ona öz fəaliyyətinə görə hər bir şərait yaratmaq olar. Ancaq onlar ayrı şey istəyirlər. Onlar şeyx, imam olmaq istəyirlər. Niyə? Çünki əvvəllər hansısa ölkələrdən pul alıblar ki, buradakı dindarları idarə edəcəklər.

İmza toplayanların çox az sayda olduğunu bilirəm. Açıq deyirəm ki, onlar ayrı dövlətin adamlarıdır. Biz heç vaxt imkan vermərik ki, islam fundamentalizminə, islam radikalizminə yol açılsın. Mənim evimdə ağa mənəm. Düzdür, hər kəsə qapımız açıqdır, amma öz evimdə mən deyən olmalıdır, qonağın dediyi yox. Mənim ağama gəlincə, öz axirətimi dünya malına satan deyiləm. Mənim ağam Allahdır”.

Gürcüstan Müsəlmanları İdarəsinin şeyxi hesab edir ki, ölkədəki məscidlərin, demək olar, hamısı onları dəstəkləyir: “Mən bu barədə dəqiq məlumata malik deyiləm. Amma onu deyə bilərəm ki, artıq bütün məscidlərin rəsmi dövlət qeydiyyatına alınmasına başlamışıq. Bundan sonra həmin məscidlər Gürcüstan Müsəlmanları İdarəsinin məscidləri hesab olunacaq və onlara din xadimləri təyin etməyə başlayacağıq”.

Vaqif Əkbərov son Ramazanda bütün Gürcüstanı gəzdiklərini, müsəlman qardaşları ilə birgə olduqlarını deyib: “İndiyə qədər heç bir din xadimi bayramlarda bir-bir məscidləri gəzib sadə din qardaşları ilə süfrə başında əyləşməmiş, onlarla bərabər iftar açmamışdı”.

Şeyx onu da qeyd edib ki, artıq qurum Səudiyyə Ərəbistanı ilə əlaqə yaradaraq Həcc ziyarətinə gedəcək zəvvarlar üçün ayrıca kvota almağa müvəffəq olub: “Əvvəllər filan idarəyə pul verilməli idi ki, kvotaya daxil ola biləsən, yaxud sənin sənədlərinə viza vurulsun. İndi buna ehtiyac yoxdur. Gürcüstanda təxminən 1 milyon yarım müsəlman yaşayır. Kvota ilə bizdən bu il 350-400 nəfərin ziyarətə getməsi mümkündür. Artıq mənim vasitəmlə sənədlərə pulsuz viza vurulacaq. Eyni zamanda imkanlı şəxslərin vasitəsilə hər il 50-100 nəfər kasib dindarın da Həcc ziyarətinə getməsini təmin eləmək niyyətimiz var. Artıq köməklik etmək istəyən imkanlı adamlarla əlaqə yaratmışam”.


"Media forum"