Oxucu sual verir: Tarix kitablarında rast gəldiyimiz “ümmi-vələd” sözünün mənası nədir və kimlərə deyilir?

Mənbələrdə rast gəldiyimiz “ümmi-vələd” sözü xüsusi ad deyil və kənizlərin bir növünə şamildir. Bu sözün hərfi tərcüməsi “övlad anası” deməkdir. Belə ki, öz sahibindən övlad dünyaya gətirmiş kənizlər ümmi-vələd adlandırılırdı. İslam şəriəti ümmi-vələd üçün bəzi üstünlüklər nəzərdə tutmuşdur. Belə ki, digər kənizlərdən (yəni öz ağasından övlad doğmamış kənizlərdən) fərqli olaraq, ümmi-vələd xüsusi statusa sahib olurdu. Sahibi onu heç kimə sata və bağışlaya bilməzdi. Övladı sağ olduqca ümmi-vələd öz sahibinin (yənu uşağın atasının) mülkündə qalmalı idi. Sahibi vəfat etdikdən sonra isə ümmi-vələd avtomatik azad sayılırdı. Quldarlıq quruluşunun hökm sürdüyü orta əsrlərdə böyük şəxsiyyətlərin bir qismi, o cümlədən, Əhli-beyt övladlarının bir hissəsi ümmi-vələdlərdən dünyaya gəlmişdi.