Azərbaycan İlahiyyat İnstitutu öz korporativ loqosunun müəyyən edilməsi məqsədilə müsabiqə elan edib.

Dini Qurumlarla İş üzrə Dövlət Komitəsindən Islam.az-a verilən məlumata görə, ali təhsil müəssisəsinin yaradılmasında məqsəd Azərbaycan xalqının tarixi ənənələrinə söykənən və dövlət siyasətinin məntiqi nəticəsi olan yüksək dini-mənəvi mühitin qorunub saxlanılması və inkişaf etdirilməsi, dini fəaliyyətin təşkili sahəsində yüksək ixtisaslı kadrların hazırlanmasını təmin etməkdir.

Müsabiqənin şərtləri aşağıdakılardır:

1. Müsabiqədə harada yaşamasından asılı olmayaraq, hər bir Azərbaycan vətəndaşı iştirak edə bilər. İştirakçılar müsabiqədə fərdi və ya müştərək qaydada təmsil oluna bilərlər;

2. Loqo müasir və beynəlxalq bir imicə sahib olmalı, Aİİ-nin dünyəvi bir elm və tədqiqat mərkəzi olduğu burada öz əksini tapmalıdır. Loqoda, həmçinin multikulturalizm və tolerantlıq dəyərlərini əks etdirən elementlər də yer ala bilər;

3. Müsabiqədə yalnız indiyə qədər istifadə olunmayan və hər hansı digər loqotiplərin elementlərini təkrarlamayan nümunələr iştirak edə bilər. Loqo dizaynları müvafiq komissiya tərəfindən qiymətləndirildikdən sonra qalib elan ediləcək;

4. Loqonun eskizi A4 formatda kağızda və ya CD disk şəklində Bakı şəhəri, Əhməd Cəmil 41 A ünvanına (Azərbaycan İlahiyyat İnstitutunun inzibati binası), eləcə də PDF formatında [email protected] elektron ünvanına və ya İnstitutun rəsmi facebook səhifəsinə təqdim edilməlidir;

5. Mükafat fondu 300 AZN nəzərdə tutulub;

6. Loqo nümunələrinin son təqdimetmə tarixi 05.08.2018-ci il saat 24:00-a qədərdir;

7. Müsabiqənin qalibi 2018-ci il avqustun 10-da elan olunacaq.