Gəncədə baş verən məlum kriminal hadisə bəlkə də bir hadisə kimi artıq arxa plana keçib. İndi bu terrora hədəf olan şəxslər deyil, daha çox cinayəti törədənin ətrafında müzakirələr aparılır. Özü də, ən paradoksalı da elə budur, bəzi qüvvələr bunu öz maraqları çərçivəsində etməyə cəhd göstərir. Bu qüvvələrə  nəzər yetirdikdə isə, onları əsasən iki qrupa bölmək mümkündür. Onların həm oxşar, həm də fəqrli cəhətləri var.

Oxşar cəhətləri budur ki, hər ikisi fürsətçildir, imkan arayırlar ki, Azərbaycanda hökm sürən sabitliyi pozsunlar, dini cameəni istifadə etməklə cəmiyyəti öz məhvərindən oynatsınlar. Fərqlilikləri isə bundan ibarətdir ki, birinci qrup bunun üçün ölkənin böyük əksəriyyətini təşkil edən şiə məzhəbinin ardıcıllarının ən duyğulu nöqtələrini istifadə etməklə məqsədinə qovuşmağa çalışırsa, ikinci qrup əksinə, bu məzhəbi qaralamaqla, olmazın böhtanları ilə “bombalamaqla” çirkin niyyətlərini həyata keçirməyə can atır.

Bu dəfə də ssenarilər dəyişmədi. Gəncə hadisəsinə hələ hüquqi qiymət verilməmiş, heç bir şeyə aydınlıq gətirilməmiş “vətənpərvərlər” artıq iş başında idilər. Arazın o tayından ilk həmlə gəldi (diqqət etmək lazımdır ki, söhbət heç də İran hakimiyyətindən deyil, İranda fəaliyyət göstərən məhdud bir qrupdan gedir). Yenə də cihad, imam və sair müqəddəs dəyərlərlə manipulyasiya edildi. Məqsəd isə, qeyd etdiyimiz kimi, hər bir Əhli-beyt tərəfdarının əziz tutuduğu müqəddasatdan istifadə edərək cəmiyyətdə iğtişaş yaratmaq, qarışıqlıq dalğasında gündəmə gəlmək, özünə dividend qazanmaq idi.

Digər – təkfirçi, radikal sələfi əqidəsində olan, hər zaman İŞİD vəhşiliklərinə dini don geyindirən və bu terror təşkilatını dəstəkləyən qrupun fəalları da gecikmədilər. Dərhal utanmadan şiələrlə İŞİD arasında bərabərlik işarəsi qoyuldu. Yenə də “əsl İslam” haqqında nağıllar eşidildi (hərçənd, onlar heç səngiməmişdi də, bəzi deputatların və psevdo-ilahiyyatçıların sayəsində). Məqsəd isə, artıq qeyd etdiyimiz kimi, müsəlmanlarda qıcıq yaratmaq, dini cameəni iğtişaşlara sürükləməkdir.

Bu arada nə birinci, nə də ikinci qrupa aid olanları eyni səfdə yer almaları qətiyyən təəccübləndirmir və narahat etmir. Amma qəribədir, sözdə guya barışmaz düşmən və rəqibdirlər bunlar. Gəl ki, indi bu qrup əl-ələ verib hər şeyi şiələrin boynuna atır. Zatən bəlli olur ki, şiə üçün yekun nəticə olaraq onlar arasında heç bir fərq yoxdur: hər ikisi şiələrin ziyanına işləyir. Elə bir bu hal düşünən insanlar üçün kifayətdir ki, hər iki qrupun kimin dəyirmanına su tökməsi bəlli olsun.