Oxucu sual verir: İnsan günorta namaz qılmağa imkan tapmayacağını bilirsə, səhər evdən çıxmazdan əvvəl zöhr və əsr namazlarını da qıla bilərmi?

Namazla bağlı əsas hökmlərdən biri də namaz vaxtlarına riayət etməkdir. Şəriətə görə, hər namazın qılınma vaxtı vardır, bu vaxt daxil olmazdan əvvəl və bitdikdən sonra həmin namazı qılmaq olmaz, əks halda qılınan namaz batildir. Zöhr və əsr namazlarının vaxtı zöhr anından, yəni günortadan başlayır və məğrib azanına kimi davam edir. Bu iki namaz həmin vaxt aralığında ardıcıllığı gözləmək şərti ilə (əvvəlcə zöhr, sonra əsr namazı) qılınmalıdır. Zöhr anı daxil olmazdan əvvəl bu namazları qılmaq olmaz, qılınsa batil sayılar.

Bəzi insanlar işdə namaz qılmağa imkan olmayacağını düşünərək, səhər günorta namazlarını da qabaqcadan qılıb getməyi düzgün hesab edirlər. Halbuki, bu şəkildə qılınan zöhr və əsr namazları qəbul edilmir. Bu şəxslər zöhr vaxtı ilə məğrib vaxtı arasındakı müddətdə hər mümkün vasitə ilə namazlarını qılmağa çalışmalıdırlar. Əgər işdə namazları qılmağa imkan yoxdursa, Günəş batana kimi evə qayıtdıqları təqdirdə, onları evdə də qıla bilərlər. Hər bir halda, vaxtı daxil olmazdan əvvəl qılınan namaz batildir.