Oxucu sual verir: Ramazan ayında yuxuda insandan məni gəlsə, oyandıqdan sonra sübh azanına kimi suyu qızdırmağa vaxt çatmasa, nə etməlidir? Əgər sübh azanından sonra yuxudan oyansa, nə etməlidir?

Oruc qaydalarına görə, sübh azanına kimi cənabət halında qalmaq orucu batil edər və cənabətli şəxs imkan dairəsində sübh azanına kimi mütləq qüsl almalıdır. Gecə möhtəlim olmuş (məni gəlmiş) şəxs yuxudan ayılandan sonra əgər sübh azanına qədər suyu qızdıra biləcəksə, bunu dərhal etməli və qüsl almalıdır. Əgər sübh azanına kimi suyu qızdırmaq və ya hər hansı ciddi səbəb üzündən qüsl almaq mümkün deyilsə, o halda qüsl əvəzinə təyəmmüm etməlidir, amma gün ərzində qılınan namazlar üçün qüsl almalıdır. Belə ki, sübh azanına kimi qüsl ala bilməsə, təyəmmüm etməli, sonra sübh namazının son vaxtına kimi imkan yaranarsa, qüsl edib sübh namazını qılmalıdır. Əgər sübh azanından sonra yuxudan oyanıb möhtəlim olduğunu görsə, bu halda, orucu düzgündür, amma namazları qılmaq üçün qüsl almalıdır.