Azərbaycan və Pakistan arasında çox yaxşı və davamlı dosluq münasibətləri var. Bu münasibətlər çox qədim tarixə malikdir.

İki qardaş ölkə arasında artan hərtərəfli əməkdaşlıq və anlaşma bizim bir-birimizə olan səmimi münasibətin təzahürüdür. Biz bu əlaqələrin daha da genişləndirilməsi üçün əlimizdən gələni edirik. Bu sözləri SalamNews-a müsahibəsində Pakistan İslam Respublikasının Azərbaycandakı fövqəladə və səlahiyyətli səfiri İnayat Ullah Kakar bildirib.

- İki ölkə arasında iqtisadi münasibətlərin vəziyyəti necədir?


- Azərbaycan ilə Pakistan arasında çox yüksək siyasi münasibətlərin olmasına baxmayaraq, iqtisadi münasibətlər bir o qədər yüksək inkişaf etməyib. Biz çalışırıq ki, iki ölkə arasında iqtisadi münasibətləri inkişaf etdirək və siyasi münasibətlər səviyyəsinə çatdıraq. Cari ilin ötən dövründə Pakistan ilə Azərbaycan arasında ticarət dövrüyyəsi 10 milyon ABŞ dollarına çatıb. Əlbəttə, bu, çox azdır.

Gələn ilin martında Bakıda iki ölkənin hökumətlərarası birgə komissiyasının iclası keçiriləcək. Bu, Azərbaycanla Pakistan arasında bütün sahələrdə inkişafın daha da artırılması üçün yaxşı mənada şərait yaradacaq. Komissiyanın iclasında Pakistanın yüksək vəzifəli şəxisləri Azərbaycana gələcəklər.

- Pakistan hansı sahələrdə Azərbaycanla əməkdaşlıq etmək niyyətindədir?


- Pakistanda yüngül sənaye, maşınqayırma, kənd təsərüfatı avadanlığı və məhsulları daha çox inkişaf edib. Əlimizdən gələni edəcəyik ki, iki ölkə arasında bu sahələri daha da inkişaf etdirək. Tibb və mühəndislik sahəsində də əməkdaşlığı planlaşdırırıq.

- Ölkəniz Azərbaycana sərmayə qoymağa maraqlıdırmı?


- Azərbaycanın çox güclü iqtisadiyyatı var və bu, daha da inkişaf edir. Xüsusilə də neft və qaz sahələrinə daha çox sərmayə qoymağı düşünürük. Ümumilikdə neft və bank sektoruna investisiya qoymağı planlaşdırılır. Azərbaycanda Pakistan Müsəlman Kommersiya Bankı fəaliyyət göstərir. Bu bank Azərbaycana böyük həcmdə investisiya qoyur.

- Pakistan-Azərbaycan biznes əlaqələrinin genişləndirilməsinə maneə olan nədir?


- Pakistanın və Azərbaycanın biznes adamları arasında əlaqələrin qurulmasında əlbəttə, çətinliklər var. Deyə bilərəm ki, Pakistan ilə Azərbaycan arasında birbaşa təyyarə reysləri yoxdur. Həmçinin dil problemi var. Coğrafi mövqedən də götürsək iki ölkə çox böyük məsafədə yerləşir. Əlmizidən gələni edirik ki, iki ölkə arasında iqtisadi münasibətləri inkişaf etdirək.

- Azərbaycanda nə qədər Pakistanlı yaşayır və bu il səfirliyə viza almaq üçün müraciət olunubmu?

- Pakistanın 400-ə yaxın vətandaşı Azərbaycanda yaşayır. Bu böyük rəqəm deyil. Onların çoxu Azərbaycanda kiçik bizneslə məşğuldurlar. Elə pakistanlı var ki, 15 ildən artıqdır Azərbaycanda yaşayır.

Bu ilin ötən dövründə 500-600 insan Pakistanın Azərbaycandakı səfirliyindən viza alıb. Ötən il bu rəqəm 400 idi. Göründüyü kimi, bu rəqəm hər il artır.

- Pakistanla Azərbaycan arasında hərbi əməkdaşlıq hansı səviyyədədir?

- Azərbaycanlı zabitlər Pakistana gedərək Silahlı Qüvvələrdə təlimlər keçirlər. Azərbacan hökmətinə hər il 6 zabiti Pakistana göndərməsi və orada treninqlərdə və təlimlərdə iştirak etməsi üçün imkan yaradırıq. Biz həmçinin Pakistandakı Diplomatik Akademiyaya azərbaycanlı diplomatların təhsil almalarına şərait yaradırıq. Bu il diplomat yox, hərbi sahədə çalışan zabitlər göndəriləcək. Artıq kurslar başladığı üçün bu il oraya təhsil almaq üçün diplomatları göndərə bilmədik. Amma gələn il 2-3 azərbaycanlı diplomat təhsil almaq üçün Pakistana göndəriləcək.