İsrail XİN-in başçısı Aviqdor Liberman Türkiyənin Baş naziri Rəcəb Tayyib Ərdoğana qarşı plan tərtib edib. "Yedioth Ahronoth" qəzetinin yazdığına görə, "Liberman planı" iki əsas bənddən ibarətdir: türklərlə qarşıdurmada ermənilərin və kürdlərin dəstəklənməsi və milli azlıqların hüquqlarının Ərdoğan hökuməti tərəfindən pozulmasına diqqət çəkən beynəlxalq kampaniyanın keçirilməsi.

Nəşrin məlumatına görə, "dünən XİN-in məsul əməkdaşları şənbə günü Libermanın iştirakı ilə keçiriləcək və İsrailin Ərdoğanın hərəkətlərinə cavaba həsr olunacaq iclasa hazırlıq aparıblar. Nazirlikdə belə qənaətə gəliblər ki, Türkiyədən üzr istəmək faydasızdır. Belə ki, bu üzrlər qəbul edilməyəcək, Ərdoğan isə yeni güzəştlər tələb edəcək. Odur ki, barışıq yolları aramaq əvəzinə İsrail dilomatları sabiq strateji tərəfdaşlarına qarşı "layiqli cavab" tədbirləri görməyə başlayıblar. XİN həmçinin "erməni soyqırımı"nın tanınması istiqamətində beynəlxalq erməni lobbisinə istənilən yardımı göstərməyi planlaşdırır".

SalamNews-un izrus.co.il. saytına istinadən verdiyi xəbərə görə, Libermanın planına uyğun olaraq, eyni məqsədlə kürd mühacirətinin liderləri ilə də əlaqələr qurulacaq.

Bundan başqa, İsrailin xarici ölkələrdəki diplomatik nümayəndəlikləri milli azlıqların Türkiyədə sıxışdırılmasına diqqət çəkmək məqsədi ilə geniş təbliğat kampaniyasına cəlb olunacaqlar.

"Yedioth Ahronoth" Libermandan belə bir sitat gətirir: "Biz Ərdoğanı elə hesab verməyə məcbur edəcəyik ki, o, İsraillə üz-üzə gəlməyin məqsədəuyğun olmadığını anlayacaq".