Azərbaycanın İordaniya Haşimilər Krallığındakı səfiri Elman Araslı İordaniyanın ən böyük ali təhsil ocağı hesab olunan İordaniya Universitetinin rektoru Adil Tuveysi ilə görüş keçirib. Səfirlikdən APA-ya verilən məlumata görə, görüşdə Bakı Dövlət Universiteti ilə İordaniya Universiteti arasında əməkdaşlığın yaradılması məsələləri müzakirə olunub və yaxın vaxtlarda bu ali təhsil ocaqları arasında Anlaşma Memorandumunun imzalanmasına dair razılıq əldə edilib.

Bu il Azərbaycanın müstəqilliyinin bərpasının 20-ci il dönümünün qeyd edildiyini söyləyən E. Araslı bu münasibətlə səfirliyin İordaniya Universitetində Azərbaycan gecəsi keçirmək və bu mövzuda geniş sərgi təşkil etmək niyyətində olduğunu bildirib.

A. Tuveysi hər iki ölkənin ali təhsil ocaqları arasında əməkdaşlığın qurulmasının vacibliyini qeyd edərək İordaniya Universiteti ilə Bakı Dövlət Universiteti arasında imzalanacaq Anlaşma Memorandumunun gələcəkdə digər ali məktəblər üçün yaxşı təcrübə olacağını söyləyib. Səfirliyin İordaniya Universitetində Azərbaycanın müstəqilliyinin bərpasının 20 illiyinə dair gecə keçirmək niyyətini alqışlayan rektor, tədbirin təşkili üçün universitetin hər cür köməklik göstərməyə hazır olduğunu vurğulayıb