İsrailə gedən türk turistlər hava limanında təhqiredici rəftara məruz qalıb, onlar soyundurulublar.

SalamNews-un “Anadolu” agentliyinə istinadən verdiyi xəbərə görə, İsrailə Ramazan bayramı tətili səbəbi ilə gedən türk turist qrupu Təl-Əviv hava limanında yoxlamalar zamanı onlara qarşı davranışdan şikayət ediblər.

Atatürk hava limanında Tel Əvivdə gördükləri rəftarla bağlı jurnalistlərə məlumat verən turistlər bayramın 3-cü günü Qüdsü ziyarət etmək istədikləri üçün İsrailə getdiklərini söyləyiblər.

Turistlərdən biri başına gələn əhvalat barədə deyib: "Məni və bir neçə yoldaşımı ayıraraq uzun müddət gözlətdilər. Elektron adresimiz, mobil telefonumuz, ailəmiz, evli olub-olmadığımız, neçə uşağımız olduğuna qədər bütün məlumatları istədilər. 19.45 təyyarəsinə minmək üçün hava limanına getdik. Saat 17.00-da növbəbə ilə əşyalarımızı verdik. Çamadanlarımız ən incə detallarına qədər dəfələrlə yoxlanıldı. Sonra bizi xüsusi otağa saldılar. Bu otaqda polis üzərimdəki hər şeyi çıxarmamızı istədi. Həm əllə, həm də detektorla axtarmağa başladılar. Üzərimdəki bütün paltarları soyunmağımızı tələb etdilər. Mən də etiraz etdim. Onlar isə israr edirdilər. Tərcüməçi istədim və mənə əl vurduqları zaman onları bərk itələdim. Bu vaxt hava limanında nə qədər mülki polis vardısa hamısı otağa girdi. “Niyə soyunmursan” dedilər. Mən də “Müsəlmanam və soyunmayacam” dedim. “O zaman səni təyyarəyə buraxmayacayıq” dedilər. Mən də “problem deyil, mənim ölkəm məni buradan cıxardar, amma biz bu haqsızlıq və terrorist rəftarına layiq deyilik” dedim. Ancaq onlar məni zorla soyundurdular. Mən əsəbi şəkildə otaqdan çıxarkən türk qadınlarının da eyni şəkildə bu soyunma otaqlarına aparıldığını gördüm. Bu, bizi daha da kədərləndirdi. Bunu yalnız türklərə etdilər. Xüsusi otaqlara yalnız türkləri apardılar. Bizə qarşı dünyada heç bir ölkənin edə bilməyəcəyi şəkildə həyasızca bir rəftarı burada gördük. Biz Türkiyə olaraq bunu qəbul edə bilmərik. İsrail bu şəkildə davranaraq sionist bir rəftar sərgiləyir".