Hazırda Liviyada əsas hadisələr Tripolidən 160 km cənub-qərbdə yerləşən Bani-Valid şəhəri ətrafında cərəyan edir.

SalamNews-un İTAR-TASS-a istinadən verdiyi xəbərə görə, bu şəhərdə yaşayan varfallar tayfası Müəmmar Qəddafiyə sadiq qalıblar. Qiyamçıların şəhər ətrafındakı bütün strateji əhəmiyyətli obyektləri ələ keçirdikləri deyilir. Dünən müxalifət qüvvələrinin komandanı Muhəmməd əl-Fasi bildirib ki, Bani-Validin sülh yolu ilə təslim olması baş tutmayıb, buna görə də şəhərə hücum həyata keçiriləcək.

Milli Keçid Şurası Müəmmar Qəddafinin 2 oğlunun Bani-Validdə olduğunu deyib. Polkovnikin özünün də orda gizləndiyi təxmin edilir.

MKŞ isə Müəmmar Qəddafinin oğullarından biri-Xamis Qəddafinin öldürüldüyünü rəsmən bəyan edib. MKŞ-in rəsmi nümayəndəsinin sözlərinbə görə, Xamis Tripoli ətrafında gedən döyüşlər zamanı öldürülüb və Bani-Valid yaxınlığında dəfn olunub. O həmçinin kəşfiyyat rəsisi Abdulla əs-Senusinin oğlu Muhəmmədin də öldürüldüyü barədə sübutların olduğunu qeyd edib.

Əlcəzair müvəqqəti olaraq Liviya ilə təqribən 1000 km məsafədə uzanan sərhəddi bağlayıb. Buna səbəb kimi isə Liviya tərəfindən sərhəddin qorunmaması göstərilir.