Oxucu sual verir: Əxlaq və irfan kitablarında rast gəldiyimiz “mühasəbeyi-nəfs” ifadəsi nə deməkdir?

Mühasəbəeyi-nəfs yəni nəfsi hesaba çəkmək, nəfsi (ruhu) sorğu-sual qarşısında qoymaq. Hədislərdə buyurulur ki, sorğu-suala çəkilməzdən (yəni ölümdən) qabaq özünüzü sorğu-suala çəkin. Dinimizdə bəyənilir ki, insan hər axşam yatmazdan qabaq öz əməlləri barədə düşünsün, gün ərzində etdiyi hərəkətləri, danışdığı sözləri xatırlasın. Əgər hər hansı günaha yol veribsə, buna görə tövbə etsin və bir daha bu günaha yol verməyəcəyini qərara alsın. Əgər hər hansı yaxşı əməl edibsə, buna görə Allaha şükür etsin və o əməli qəbul etməsini Allahdan diləsin. Mühasəbeyi-nəfsi tərk etməmək, hər axşam, bəzi hədislərə görə ən azı həftədə bir dəfə icra etmək təkid olunur. Bu iş insanın məsuliyyətini artırır, günahlardan uzaq durmasına və saleh əməllərə yönəlməsinə yardım edir.