Türkiyə prezidenti Abdullah Gül BMT-nin "Mavi Mərmərə" hesabatı haqqında fikirlərini bölüşüb. "AA"nın verdiyi xəbərə görə, Abdullah Gül, "BMT-nin "Mavi Mərmərə" hesabatı bizim üçün "yox" hökmündədir" - deyib.

Abdullah Gül BMT İstintaq Komissiyasının İsrail rejimi tərəfindən törədilmiş "Mavi Mərmərə" cinayəti ilə əlaqədar hazırlanmış hesabatına sərt reaksiya verib. O, hesabatı qınayaraq, Türkiyənin İsrail rejimi ilə diplomatik əlaqələrini kəsməsinə münasibət bildirib: "Əslində, hökumətimizin BMT hesabatına bu cür reaksiyası anlaşılandır. Tərəfimizdən bu açıqlamalar və bu cür sərt tədbirlər daha əvvəl veriləcəkdi. Lakin biz müttəfiqlərimizin yaxşı niyyətli olmalarına imkan yaratdığımız üçün bu günü gözlədik. Bu gün hadisələrin unudulmadığını və vətəndaşlarımızın haqq və hüququnun sonuna qədər qorunacağını göstərmək üçün bu addımları atdıq. Ola bilsin, hökumətin atdığı bu addımı bəziləri anlamasınlar. Hadisələrin gedişatından və İsrailin atacağı addımlardan asılı olaraq, yaxın zamanlarda digər addımlar da atılacaq".
İsrail rejiminin öz xalqına da əslində, yük olduğunu deyən Abdullah Gül çıxışını belə davam etdirib: "İsrailə heç bir inam yoxdur.
İsrail hökuməti Yaxın Şərqdə baş verənləri yaxşı şəkildə təhlil etməlidir. Türkiyə bu bölgənin ən güclü ölkəsi olaraq öz haqq və hüququnu deyil, bütün məzlumların haqq və hüququnu qorumaq üçün əlindən gələni edir. Beynəlxalq camiənin də bunu bilməsini istəyirik. Türkiyə sülh və demokratiya arxasınca gedir. Sülh və demokratiyanın əldə olunması üçün İsrailin bölgədə etməli olduğu şeylər vardır. Ümid edirik ki, onlar bunları başa düşməsələr də, müttəfiqləri onlara başa salarlar".