Oxucu sual verir: Niyə Həzrət Mühəmməd Peyğəmbərin (s) həyat yoldaşlarına ümmül-möminin deyilir?

Ərəb dilindən tərcümədə ümmül-möminin “möminlərin anası” deməkdir. Qurani-Kərimdə Allah-Taala onların barəsində buyurur: “Peyğəmbər möminlərə onların özlərindən daha yaxındır, Onun övrətləri (möminlərin) analarıdır” (Əhzab, 6). Bu ayə bütün müsəlmanlara Peyğəmbərin (s) xanımları ilə hörmət və sayğı əsasında davranmağı vacib etdi. Digər ayədə isə buyurulur: “Sizə Allahın Peyğəmbərini incitmək, özündən sonra Onun zövcələri ilə evlənmək əsla yaraşmaz! Həqiqətən, bu, Allah yanında böyük günahdır!” (Əhzab, 53). Təfsirlərdə yazılıb ki, Peyğəmbərin (s) sağlığında bəzi tərbiyəsiz adamlar düşünürdülər ki, həzrət vəfat etdikdən sonra onun xanımları ilə evlənsinlər. Amma bu xanımlar möminlərin anası adlandırıldı və bununla da onların möminlərə ana kimi əbədi haram (məhrəm) olmaları məlum oldu.