Hazırda Suriyada 90-a yaxın Azərbaycan vətəndaşı var

Azərbaycanın Suriyadakı səfirliyi adi rejimdə fəaliyyətini davam etdirir. Səfirlikdən APA-ya bildiriblər ki, konsulluq əməkdaşları bu ölkədə yaşayan Azərbaycan vətəndaşları ilə mütəmadi əlaqə saxlayırlar: “Onları xəbərdar etmişik ki, arzu edərlərsə, ölkəni tərk edə bilərlər. Səfirlik bu işdə onlara kömək etməyə hazırdır. Lakin ölkədə vəziyyət o qədər ağır deyil ki, vətəndaşlarımız buranı tərk etmək istəsinlər”.

Hazırda səfirliyin konsulluq xidmətindən Suriyada yalayan 80-90 Azərbaycan vətəndaşı qeydiyyatdadır. Onların əksəriyyəti tələbələr və Suriya vətəndaşları ilə ailə qurmuş şəxslərdir.

Qeyd edək ki, “Əl-Cəzirə” telekanalı Suriyada iğtişaşların davam etdiyini bildirir. Bu gün səhər Suriya təhlükəsizlik qüvvələri Dəməşqin mərkəzində nümayişçilərə atəş açıblar. Nəticədə 8 nəfər yaralanıb. Suriyada iğtişaşlar martın ortalarından etibarən başlayıb. BMT-nin məlumatlarına görə, ölkədə toqquşmalarda ölənlərin sayı 2,200 nəfəri keçib.