Oxucu sual verir: Bir adam namazını iş yerində və ya məktəbdə qılır. Hamı ayaqqabı ilə gəzdiyindən yer kirli olur. Belə olan halda həmin adam stulda oturmuş vəziyyətdə namaz qıla bilərmi?

Namazı bilərəkdən qəzaya vermək günahdır və hər bir şəraitdə namaz qılınmalıdır. Namaz zamanı yalnız alın dəyən yerin – torpağın və ya möhürün – pak olması vacibdir. Qalan yer pak olmasa da, namaz düzgündür. Amma bu, ədəbə uyğun deyil və insanın pal-paltarı bulaşar. Ona görə yerə bir qəzet və ya kordon sərib üzərində namaz qılmaq daha yaxşıdır. Namaz ayaq üstə qılınmalıdır, yalnız şəriət baxımından üzürlü olanlar namazı oturmuş halda qıla bilərlər. Şəriət baxımından üzür deyərkən məsələn, ayaq üstə dura bilməyəcək dərəcədə xəstə olmaq, çox alçaq tavanı olan yerdə namaz qılmağa məcbur qalmaq kimi hallar nəzərdə tutulur. Yerə qəzet sərib namaz qılmaq imkanı varsa, oturmuş halda namaz qılmaq olmaz və bu cür namaz batil sayılar.