Oxucu sual verir: Aşura günündə hədik bişirmək barədə dini göstəriş varmı?

Qeyd edək ki, hər bir millətin özünəməxsus mühərrəmlik ənənələri vardır. Xalqımızın və eləcə də, bəzi yaxın xalqların mühərrəmlik ənənəsinə görə aşura günündə hədik adlı paxlalı bitkilərdən hazırlanmış xörək bişirilir. Bu barədə dini mənbələrdə məlumat yoxdur. Aşura günü hədik bişirmək dini vəzifə deyil və vacibatdan da sayılmır. İnsanlar aşuraya ehtiram əlaməti olaraq bu yeməyi hazırlayırlar. Bişirilən hədiyi qohum-qonşuya paylamaq da ənənə şəklini alıb. Bəzən iri qazanda hədik bişirir və yoldan keçən hər kəsə təklif edirlər. Hədiyin tərkibi coğrafi şəraitdən asılı olaraq qismən dəyişə bilər.

Hədiyin tarixi barədə xalq içində belə bir rəvayət gəzir ki, guya Şam xarabalığında əsir uşaqların aclığına dözməyən Həzrət Zeynəb ocağın üstünə su ilə dolu qazan qoyub qaynatmağa başlayır. Sonra ovcuna yerdən daş-kəsək yığıb qazanın içinə tökür. Uşaqlar onun başına yığışanda deyir ki, onlar üçün yemək hazırlayır. Allahın möcüzəsi ilə qazanın içindəki daş-kəsək həqiqətən paxlalı bitkilərə dönür və əsirlər o yeməkdən yeyib doyurlar. Lakin bu rəvayət mötəbər dini mənbələrdə öz təsdiqini tapmayıb.