Asiya İnkişaf Bankının (AİB) Direktorlar Şurası tərəfindən təsdiqlənən "Ölkə üzrə əməliyyatlara dair 2011-2013-cü illər üçün Biznes-Plan"ı çərçivəsində AİB Azərbaycana 950 mln. ABŞ dollarına yaxın vəsait ayıracaq.

AİB-in Bakı ofisindən "APA-ECONOMICS"ə verilən məlumata görə, ölkə üzrə əməliyyatlara dair biznes-plana əsasən, AİB Azərbaycana 2011-ci ildə 340 mln. dollar (ehtiyat kreditlər da daxil olmaqla), 2012-ci ildə 355 mln. dollar, 2013-cü ildə isə 250 mln. dollar məbləğində vəsait ayırması planlaşdırır. Eyni zamanda, biznes-planın icrası üçün AİB 2 mln. dollar dəyərində texniki yardım (qrant) ayıracaq.

Biznes-plana uyğun olaraq, AİB nəqliyyat, enerji, su təminatı, kanalizasiya, şəhərdaxili xidmət sektorlarını dəstəkləməkdə davam edəcək. Nəqliyyat sektorunda AİB Masallı-Astara yolunun maliyyələşdirilməsi üçün yeni kreditlər ayıracaq. Bank, həmçinin Bakı ilə Gürcüstan sərhədi arasındakı əsas magistral yolların yenidən qurulması layihələrinin maliyyələşdirilməsini də nəzərdən keçirir. Bakı ilə Gürcüstan arasındakı magistral yollar Mərkəzi Asiya Regional İqtisadi Əməkdaşlıq (CAREC) Proqramının əsas dəhlizi hesab edilir.

Bundan başqa, AİB-in Azərbaycanda enerji sektoru ilə bağlı investisiya proqramı milli paylama şəbəkəsinin gücləndirilməsi və yenilənməsi, enerji təminatı ilə bağlı etibralılığın artırılması, paylama zamanı itkilərin azaldılması, enerji sektorunun maliyyə, idarəetmə və əməliyyat sahələrinin təkmilləşdirilməsini nəzərdə tutur.

Eyni zamanda, şəhərdaxili xidmətlər sahəsində AİB Azərbaycan hökumətinə ikinci dərəcəli şəhərlərdə su təminatı və kanalizasiya xidmətlərinin təkmilləşdirilməsinə yardım göstərməkdə davam edəcək. AİB şəhərdaxili nəqliyyat layihələrinin maliyyələşdirilməsini də nəzərdən keçirmək niyyətindədir.

Qeyd edək ki, 2012-ci ildə AİB Azərbaycan üzrə yeni tərəfdaşlıq strategiyasının hazırlanmasını da planlaşdırır.

Xatırladaq ki, Azərbaycan 1999-cu ildən AİB-in üzvüdür. Hazırda AİB-in Mərkəzi Asiya Regional İqtisadi Əməkdaşlıq Proqramı (CAREC) çərçivəsində Azərbaycanda Yevlax-Gəncə və Qazax-Gürcüstan sərhədi avtomobil yollarının reabilitasiya və genişləndirilməsi, Dəmir Yolu Ticarəti və Daşımalara Dəstək layihələri, habelə "Şəhər su təchizatı və kanalizasiya Layihəsi", "Elektrik enerjisinin ötürülməsi sisteminin yaxşılaşdırılması Layihəsi", Gəncə dairəvi avtomobil yolunun tikintisini və digər layihələr maliyyələşdirilir. AİB 10 illik (1999-2009) əməkdaşlıq dövrü ərzində Azərbaycana 600-700 mln. ABŞ dolları civarında vəsait, eləcə də 11,5 mln. dollar qrant ayırıb.