"Orta məktəblərdə hicabla bağlı yaranmış problemin həlli üçün ölkə Prezidentinə 100 min imzalıq müraciət təşəbbüsünü dəstəkləyirəm və ümid edirəm ki, bu problem bütün cəmiyyətin xeyrinə olan formada öz həllini tapacaqdır.
Hesab edirəm ki, orta məktəbə öz dini əqidəsniə uyğun olaraq başörtülü gəlmək arzusunda olan şagirdlərin müəyyən mənada dərsdən kənar qalması ilə səciyyələnən bu problemin məhz hicabla dərsə gəlməyə icazə verilməklə həlli bir neçə aspektdən zəruridir.

Belə bir qadağa cəmiyyətdə indiyədək mövcud olmamış və mövcud olması nə cəmiyyətə, nə millətə, nə də dövlətə xeyir gətirməyən dini əqidəyə münasibətdə cəmiyyətdaxili bölünmə presedentini yaratmışdır və təəssüf ki, bu problem kəskinləşməyə meyllidir.
- Bu problemin mövcudluğu ilk növbədə Azərbaycanın beynəlxalq imicininin zərərinədir və istər dini azadlıqları insan haqlarının baza prinsiplərindən hesab edən Qərb, istərsə də İslam inanclarına riayəti vacib hesab edən müsəlman dünyasında Azərbaycanı sevməyən qüvvələr tərəfindən ölkə haqda qeyri-müsbət imic formalaşmasına rəvac vermiş olur.
- Bu problemin yaranmasına səbəb olmuş hicabla orta məktəblərdə dərsə gəlməyə qoyulan qadağa - ictimai yükü olmayan və ictimai mənafe baxımından məqsədsiz haldır.
- Bu problemin həlli ilk növbədə vətəndaş həmrəyliyinə və dindar təbəqə arasında dövlətə etimadın güclənməsinə xidmət etmiş olardı. Təəssüf ki, problemin mövcudluğu hətta əvvəllər olmuş etimadı da zəiflətmiş olur.
- Nəhayət, bu problemin mövcudluğu ölkə Prezidentinin Azərbaycanın inkişafı istiqamətində apardığı siyasi kursa uyğun deyil.

Bütün bu sadalananlar baxımından problemin məhz bu formada, yəni ölkə rəhbərinə müraciət və Azərbaycan vətəndaşlarının hüquqlarının qarantı olan cənab Prezidentin siyasi iradəsi ilə həll edilməsi ən məqbul variant və cəmiyyətdə din-dövlət münasibətləri aspektindən yeni bir mərhələ olardı".
İslam Konfransı Gənclər Forumu Avrasiya Beynəlxalq Şurasının sədri Elçin Əsgərov