"İnanıram ki, fələstinlilər müstəqil Fələstin dövlətinin beynəlxalq birlik tərəfindən tanınması məqsədinə nail olacaq".

Bu fikirləri APA-ya müsahibəsində İsrail Knessetinin üzvü, "Raam-Taal" ərəb blokunun sədri İbrahim Tsattsur verib.
Fələstin administrasiyasının prezidenti Mahmud Abbas bəyan edib ki, muxtariyyət rəhbərliyi bütün ölkələrə müraciət edərək müstəqil Fələstin dövlətini 1967-ci il sərhədləri çərçivəsində tanımağa çağırıblar. Sentyabrda isə bununla bağlı BMT-yə rəsmi müraciət olunacaq. Bu gün 122 dövlət Fələstini 1967-ci il sərhədləri daxilində müstəqil ölkə kimi tanıyıb.
Knesset üzvü deyib ki, fələstinlilərin BMT-nin daimi üzvü statusu almaq üçün bu quruma müraciət etməyə tam hüququ var. Bu gün Fələstin muxtariyyəti BMT-də yalnız müşahidəçi hüququna malikdir.
Fələstinin tanınması məsələsi sentyabrda BMT Baş Assambleyasının növbəti iclasında qaldırılacaq. Bu qərar muxtariyyətlə İsrail arasında uzun müddət davam edən sülh prosesinin martda dayandırılması ilə əlaqədar qəbul edilib. Danışıqların dayandırılmasına səbəb İsrailin İordan çayının qərbində və Şərqi Yerusəlimdə yəhudi məskənlərinin tikintisini genişləndirməyi dayandırmaqdan imtina etməsi olub. ABŞ isə Fələstini birtərəfli addımlar atmamağa çağırıb və Baş Assambleyada keçiriləcək səsvermədə veto hüququndan istifadə edəcəyi ilə hədələyib.
"Amerika anlamalıdır ki, Fələstin dövləti layihəsinə qarşı veto hüququndan istifadə sülh prosesində tərəqqiyə nail olmağı çətinləşdirə bilər. Bu proses əslində İsrailin barışmaz mövqe tutması səbəbindən yarımçıq qalıb. ABŞ administrasiyasının rasional və məntiqli hərəkət etməyə çağırıram. ABŞ kor-koranə İsrailə dəstək verməklə Yaxın Şərqdəki maraqlarını zərbə altına qoyur və pis imic qazanır".
Ərəb ölkələrində baş verən inqilabların sülh prosesinə və Fələstin dövlətinin tanınmasına təsirinə gəlincə, Tsartsur deyib ki, Yaxın Şərqdə bütün proseslər sülh prosesinin lehinə inkişaf edir.
"Fələstinlilər və ərəb dünyasının əksəriyyəti İsraillə sülh istəyirlər. İsrail hələ də ərəb ölkələri ilə sülh sazişi imzalamaq imkanını tam itirməyib. Bu ölkə hələ də ərəb ölkələrinin münaqişənin nizamlanması, qan tökülməsini dayandıraq təklifini rədd edir. Fələstin dövlətinin tanınması sülh prosesinə zərər verməyəcək, əksinə iki xalq üçün iki dövlətin yaradılması işini sürətləndirəcək. Etiraf edim ki, fələstinlilərin İsrailin barışmaz mövqeyinə qarşı mübarizədə malik olduğu vasitə o qədər çox deyil. Ümidvaram ki, ABŞ və Avropa sülh prosesində ədalətli rol oynayacaqlar".