Hacı İlqar İbrahimoğlu: "Bu iş bir ibadət olaraq həyata keçirildi"

Orta məktəblərdə hicab qadağasını ləğv olunması üçün bu ayın əvvəlində start götürmüş "Prezidentə 100 minlik müraciət" imzatoplama kampaniyası finala yetişdi. Artıq kampaniya çərçivəsində nəzərdə tutulan 100 min imza toplanılıb. Bu barədə deyerler.org saytı məlumat verib. Saytın məlumatına görə, iyulun 25-də - kampaniyanın 23-cü günü toplanan imzaların sayı 100 mini ötüb. Ancaq saytın məlumatına görə, könüllülərdə olan vərəqələrə imzaların toplanması davam edir. Bu səbəbdən imzaların sayının 100 mindən xeyli artıq olacağı planlaşdırılır.
Deyerler.org saytına açıqlamasında kampaniyanın təşkilatçısı, Dini Etiqad və Vicdan Azadlıqlarını Müdafiə Mərkəzinin sədri Hacı İlqar İbrahimoğlu 100 min imzanın toplanmasını cəmiyyətin mövzuya diqqəti və fədakar insanların əməyinin nəticəsi kimi qiymətləndirib: "Şükürlər olsun ki, yüzminlik hədd keçildi. Allah Təalanın böyük lütfü ilə, 2 ay üçün nəzərdə tutulan imzalar, 23 günə yığıldı. Ölkəmizin 100 mindən çox vətəndaşı hicab probleminin həlli üçün dövlət başçısına olan müraciəti dəstəklədi. Biz bunu mübarək Ramazan ayı öncəsi Allah Təalanın sonsuz lütfünün və mərhəmətinin təzahürü kimi dəyərləndiririk. Bu işi onlarla ilahiyyatçı qardaşımız, yüzlərlə ixlaslı mömin və möminələr bir ibadət olaraq həyata keçirdilər. Allah Təala zəhməti keçən hər bir insana öz mərhəmət və tofiqatından qəni-qəni əta etsin, inşəallah!"
DEVAMM sədri imzatoplama kampaniyasının davam edəcəyini deyib: "Hələlik imzatoplama davam edəcək. Kifayət qədər sayda imza vərəqi fəallarımızın əlindədir və böyük şövqlə imzatoplama davam edir. Yaxın zamanlarda məsləhətləşmələr və dəyərləndirmələr aparıb, atılacaq gələcək addımları müəyyənləşdirəcəyik".
Qeyd edək ki, imzatoplama kampaniyası ilə bağlı cəmiyyətin müxtəlif təbəqələrinin nümayəndələri öz fikirlərini bildiriblər.
"Turan" Agentliyinin əməkdaşı, tanınmış jurnalist Tofiq Türkel kampaniyanın yalnız dindarlar deyil, cəmiyyətin bütün təbəqələrini əhatə etdiyini, kampaniyanı ictimai və vətəndaş fəallığının bir göstəricisi saydığını deyib: "Qısa müddətdə bu qədər imzanın toplanması o deməkdir ki, burada imza atanların hamısı sırf dini ayinlərə bağlı olan adamlar deyil. Burada həmçinin bu və ya digər mənada bu məsələ ilə bağlı olmayan, amma insan haqları ilə bağlı fəaliyyəti olan insanların da iştirakını çox önəmli sayıram. Hicab bir insanın haqqıdırsa, niyə bu haqq onun əlindən alınsın?"

Jurnalist Çingiz Sultansoy isə deyerler.org-a imza kampaniyasını xalqla hakimiyyət arasında dialoqun başlanması üçün bir təşəbbüs adlandırıb: "Bu xalqımızın milli və mənəvi dəyərlərinə söykənən, İslamla formalaşan, tarixən yüzilliklər, minilliklər boyunca formalaşan dəyərlərimizə söykənən, qorunmasına söykənən hərəkətdir. Bu cür fikirləşən insanların sayı çoxalsa, imza toplanması daha da sürətlə gedəcək. Burada mənə elə gəlir ki, heç bir təəccüblü bir şey yoxdur. Elə belə də olmalı idi".
Psixoloq Azad İsazadə imza kapmaniyasını referenduma bənzədib. Hicab qadağasının ləğvi üçün imza toplanmasını yüksək qiymətləndirən A.İsazadə hicab qadağasına qarşı olduğunu deyib: "Mənim fikrim belədir ki, bu, hər kəsin öz şəxsi işidir. Hüquqi müstəvidə bu məsələni hər bir insan özü həll etməlidir. Heç kim ona bu məsələdə qadağa qoya bilməz. Bir məsələni deyim ki, dindar xanımların hüquqları kişilərdən daha çox pozulur və haqqında danışdığımız qadağa da yenə xanımlara, qızlara tətbiq olunur. İmzaların tez bir zamanda toplanması onu göstərir ki, problem ciddi səciyyə daşıyır. Bu problemə ciddi yanaşıb, həllini tapmaq lazımdır. Bu məsələni cəmiyyətin içində hansısa yolla müzakirə etməklə həll etmək mümkündür".

KƏNAN, "Yeni Müsavat"