İstanbulda İslam Konfransı Gənclər Forumunun təşkilatçılığı (İKGF), Türkiyə Xarici İşlər Nazirliyi, Sabançı Universiteti, Tuzla Bələdiyyəsi və Misirin Mədəniyyət Araşdırmaları və Mədəniyyətlərarası Dialoq Mərkəzinin dəstəyi ilə keçirilmiş ilk Beynəlxalq "İslam Əməkdaşlıq Təşkilatı (İƏT) Modeli" Konfransı 2 günlük "İƏT Xarici İşlər Nazirləri Sammiti"nin simulyasiya oyunları ilə başa çatıb.

İKGF-dən APA-ya verilən məlumata görə, İKGF Avrasiya Beynəlxalq Məşvərət Şurası sədri Elçin Əsgərovun İstanbuldan verdiyi məlumatda bildirilib ki, oyun zamanı İƏT üzv ölkələrini təmsil edən və "xarici işlər nazirləri", "nazir müavinləri", "səfir" qismində çıxış edən gənclər İslam dünyasının və beynəlxalq aləmin aktual problemlərini müzakirə ediblər.
Sammitin gündəliyinə çıxarılan ilk məsələ Dağlıq Qarabağ münaqişəsinin 17 ildən artıq danışıqlar yolu ilə həll olunmaması və təcavüzkar Ermənistanın işğal etdiyi Azərbaycan ərazilərindən çıxmaması nəticəsində yaranan şərait olub. Verilən simulyasiya tapşırığına görə İƏT nümayəndələri yaranmış böhran vəziyyətini (Ermənistanın qondarma Dağlıq Qarabağ rejimini tanıması və Azərbaycanın öz torpaqlarını hərbi yolla azad etməsi) müzakirə ediblər. Müzakirələrin sonunda Azərbaycan heyətinin irəli sürdüyü və yekdilliklə qəbul edilən qətnamədə İƏT üzv ölkələri heyətləri Ermənistana qarşı siyasi və iqtisadi sanksiyaları qəbul edib, eyni zamanda Azərbaycanın bütün vasitələrlə işğal olunmuş torpaqlarını azad etmək hüququnu tanıyaraq ölkəmizə siyasi dəstəyini bildirib, bunla bağlı BMT-də vahid xətdən çıxış etməyi qərarlaşdırıblar.
Gündəliyin digər məsələləri Liviya böhranı, "Mavi Mərmərə" Flotiliyası ilə bağlı olub. İştirakçılar Liviyada dinc əhalinin həlak olması ilə nəticələnən vətəndaş müharibəsinin dayandırılması və simulyasiya tapşırığında nəzərdə tutulduğu kimi Liviyaya daxil olmuş NATO qüvvələrinin ölkədəki statusuna İƏT-in münasibətini, eyni zamanda Liviyanın sonrakı inkişafında İƏT ölkələrinin mümkün rolunu müzakirə ediblər.
Qəbul olunmuş müvafiq qətnamədə İƏT ölkələri arealında İƏT ölkələrinin məsuliyyəti və iştirakının gücləndirilməsi nəzərdə tutulub. "Mavi Mərmərə" Flotiliyası ilə bağlı müzakirələr isə humanitar və siyasi məsələlərin kompleks həlli yollarının araşdırılmasına həsr olunub.
Simulyasiya İslam Əməkdaşlıq Təşkilatının Xarici İşlər Nazirləri Şurasının sessiyalarının prosedur qaydalarına tam uyğun şəkildə keçirilib və oyunların yekunları əsasında beynəlxalq jüri tərəfindən 3 qalib heyət müəyyən edilib. Jürinin qərarında əsasən danışıqların aparılması, qətnamə tərtibi, İƏT üzv ölkələrindəki vəziyyət barədə məlumatlılıq, natiqlik qabiliyyətlərinə görə Pakistan heyəti 1-ci yer, Azərbaycan 2-ci və BƏƏ 3-cü yerə layiq görülüblər.

E. Əsgərov deyib ki, konfransın Dağlıq Qarabağ münaqişəsi, Azərbaycanın haqlı mövqeyinin dünyaya çatdırılması istiqamətində də böyük rolu var: "Çoxsaylı universitetlərin iştirak etdiyi və Türkiyədə akkreditə olunan diplomatik nümayəndəliklərin müşahidə etdiyi sammit simulyasiyasında İƏT ölkələri gəncliyinin Azərbaycana tam dəstək verməsi dünyaya bir mesajdır".
Konfransda, həmçinin "Beynəlxalq İƏT Modelinin" gələn il Azərbaycanda keçirilməsi haqqında da qərar elan edilib.