Azərbaycan təyyarəsinin Əfqanıstanda qəzaya uğramasının səbəblərini araşdıran komissiyanın bu gün Kabildə keçirilən növbəti iclası nəticəsiz başa çatıb.

Bu barədə APA-ya açıqlamasında Azərbaycanın Pakistandakı, eyni zamanda Əfqanıstanda akkreditə olunmuş səfirliyinin 3-cü katibi Çingiz Qədirli bildirib.

Onun sözlərinə görə, Azərbaycanın səlahiyyətli şəxslərinin, əfqan rəsmilərinin və Beynəlxalq Təhlükəsizliyə Yardım Qüvvələri (İSAF) təmsilçilərinin iştirak etdiyi iclasda bir neçə məsələ diqqət mərkəzində olub: "Əlbəttə ki, əsas müzakirələr azərbaycanlı ekipaj üzvlərinin cəsədlərinin qəza bölgəsindən çıxarılması ilə bağlı aparılıb. Lakin qəzanın baş verdiyi bölgəyə nəzarət edən rəsmi Kabil və beynəlxalq koalisiya qüvvələri cəsədlərin çıxarılmasına konkret vəd verməyiblər. Onlar qəza rayonun hərbi baxımdan riskli, təbii landşaftı baxımından isə çətin ərazi olduğunu əsas gətiriblər".

Təmasların yaxın günlər ərzində bərpa olunacağı bildirilir.

Qeyd edək ki, Azərbaycanın "Silk Way" aviasiya şirkətinə məxsus "İL-76" təyyarəsi 6 iyul 2011-ci il tarixində gecə saat 00:10 (Bakı vaxtı ilə 02:10) radələrində Baqram hava limanı yaxınlığında enməyə hazırlaşarkən təyyarə ilə rabitə ani olaraq kəsilib və radarlarda görüntüsü itib. Azərbaycan Dövlət Mülki Aviasiya Administrasiyasının yaydığı açıqlamaya görə, hava gəmisinin havada naməlum obyektlə toqquşması ehtimal olunur. "Taliban" hərəkatının nümayəndəsi Zəbibulla Mücahid isə Əfqanıstan KİV-nə açıqlamasında Azərbaycana məxsus təyyarənin "Taliban" tərəfindən vurulduğunu bildirib.

Bakı-Baqram marşrutu ilə uçuşu yerinə yetirən göstərilən təyyarə göyərtəsində cəmi 18 ton yüklə 5 iyul 2011-ci il tarixində yerli vaxtla saat 21:26-da Bakının Heydər Əliyev Beynəlxalq Aeroportundan havaya qalxıb. Baqrama uçuşdan qabaq həmin gün təyyarə Küveyt-Bakı marşrutu üzrə uçuş yerinə yetirib və hər hansı nasazlıq qeydə alınmayıb.

Yük qaldırma imkanı 40 ton olan "İl-76" təyyarəsi 2005-ci ildə istehsal olunub və sonuncu dəfə 2011-ci ilin fevral ayında tam texniki baxışdan, iyun ayında isə növbəti baxışdan keçib. Təyyarənin göyərtəsində olan 9 ekipaj üzvünün hamısının həlak olduğu ehtimal edilir. Onlardan beşi Azərbaycan, dördü Özbəkistan vətəndaşıdır.