İyunun 28-də geniş tərkibdə danışıqlar başa çatdıqdan sonra Azərbaycan prezidenti İlham Əliyev və Fələstin prezidenti Mahmud Abbas mətbuata bəyanatlarla çıxış ediblər.

APA-nın AzərTac agentliyinə istinadən verdiyi xəbərə görə, öz çıxışında prezident İlham Əliyevin deyib ki, Azərbaycan-Fələstin siyasi əlaqələri çox yüksək səviyyədədir. O bir neçə ay bundan əvvəl Fələstin Dövlətinin Azərbaycandakı səfirliyi öz işinə başlamasını qeyd edərək bildirib ki, səfirliyin fəaliyyəti nəticəsində ikitərəfli əlaqələrin inkişafı üçün yeni imkanlar müəyyən ediləcək.
Prezident qeyd edib ki, humanitar və mədəniyyət sahələrində əməkdaşlıq üçün yaxşı imkanlar vardır. "Bir daha demək istəyirəm ki, Azərbaycan bütün beynəlxalq təşkilatlarda Fələstin Dövlətini dəstəkləyir. İslam Konfransı Təşkilatında, Birləşmiş Millətlər Təşkilatı çərçivəsində aparılan bütün müzakirələr zamanı Azərbaycan Fələstinin yanındadır və bundan sonra da belə olacaq. Biz hesab edirik ki, tezliklə müstəqil, suveren Fələstin Dövləti yaradılmalıdır və onun paytaxtı Şərqi Qüds şəhəri olmalıdır. Bu, bizim mövqeyimizdir və bütün beynəlxalq təşkilatlarda biz bu mövqeyi müdafiə edirik, müdafiə edəcəyik. Bu, bir tərəfdən bizim qardaşlıq borcumuzdur, digər tərəfdən, bu mövqe beynəlxalq hüquq normaları əsasında formalaşıb. Dünya miqyasında Fələstin Dövlətinə verilən dəstək və bu dəstəyin artması onu göstərir ki, Sizin diplomatiyanız, siyasi təşəbbüsləriniz, şəxsən Sizin fəaliyyətiniz dünya miqyasında çox böyük rəğbətə malikdir".
Prezident İlham Əliyev Ermənistan-Azərbaycan, Dağlıq Qarabağ münaqişəsinin həlli probleminə toxunaraq bildirib ki, beynəlxalq aləm Azərbaycanın mövqeyini dəstəkləyir. "Birləşmiş Millətlər Təşkilatı Təhlükəsizlik Şurası məsələ ilə bağlı dörd qətnamə qəbul edib. Qətnamələrdə göstərilir ki, Ermənistanın işğalçı qüvvələri işğal edilmiş torpaqlardan qeyd-şərtsiz çıxarılmalıdır. Əfsuslar olsun ki, bu günə qədər Ermənistan tərəfi bu qətnamələrə məhəl qoymur. Digər beynəlxalq təşkilatların mövqeyi də oxşardır. İslam Konfransı Təşkilatı, Avropa Parlamenti, Avropa Şurası, ATƏT buna oxşar qərar və qətnamələr qəbul ediblər".
O qeyd edib ki, məsələnin həlli üçün hüquqi əsaslar kifayət qədər möhkəmdir. "Mən əminəm ki, Azərbaycan ərazi bütövlüyünü bərpa edəcək. Biz istəyirik ki, bunu tezliklə və sülh yolu ilə həll edək", İlham Əliyev deyib.