Bakı Ağır Cinayətlər Məhkəməsində Azərbaycan İslam Partiyasının sədri Mövsüm Səmədov, partiya sədr müavini Vaqif Abdullayev, Astara rayon təşkilatının sədri Rufulla Axundzadə, Mövsüm Səmədovun qayını Firdovsi Məmmədrzayevin, qohumu Dəyanət Səmədovun və partiya üzvü Zülfüqar Mikayılovun cinayət işi üzrə məhkəmənin hazırlıq iclası başlayıb.

APA-nın xəbərinə görə, hakim Eldar İsmayılovun sədrliyi ilə keçirilən iclasda M. Səmədovun vəkili Anar Qasımov vəsatət qaldıraraq təqsirləndirilənlərin barmaqlıqlar arxasında deyil, vəkillərinin yanında oturmalarını istəyib. Məhkəmə hazırlıq iclasının predmetinə uyğun gəlmədiyini əsas gətirərək vəsatəti rədd edib.
Daha sonra vəkil M. Səmədovun müdafiə hüququnun pozulduğunu, əsas olmadan saxlandığını, inzibati qaydada saxlandıqdan sonra saxlanma yerinin qanunsuz olduğunu əsas gətirərək cinayət işinə xitam verilməsi barədə vəsatət qaldırıb.

Zamində olan təqsirləndirilən Zülfüqar Mikayılovun vəkili Gülşən Salmanova isə
müdafiə etdiyi şəxslə dünən müqavilə bağladığını, cinayət işinin materialları ilə tanış olmadığını bildirib. Buna görə prosesin iyulun 14-nə qədər təxirə salınması barədə qərar qəbul olunub.

Qeyd edək ki, ittiham olunan şəxslər yanvarın 7-də inzibati qaydada saxlanılıblar. Sonradan isə onlar Cinayət Məcəlləsinin 28, 214.2.1-ci (qabaqcadan əlbir olan bir qrup şəxs, mütəşəkkil dəstə və ya cinayətkar birlik (cinayətkar təşkilat) tərəfindən terrora hazırlıq), 28, 214.2.3-cü (odlu silahdan və silah qismində istifadə olunan predmetlərdən istifadə etməklə terrora hazırlıq), 228.3-cü (qanunsuz olaraq odlu silah, onun komplekt hissələrini, döyüş sursatı (yivsiz odlu ov silahı və həmin silah üçün döyüş sursatı istisna olmaqla), partlayıcı maddələr və qurğular əldə etmə, başqasına vermə, satma, saxlama, daşıma və ya gəzdirmə), 278-ci (hakimiyyəti zorla ələ keçirmə və ya onu zorla saxlama) maddələr üzrə ittiham olunublar.