Ötən həftə Ciddə şəhərində işini başa vuran İslam Konfransı Təşkilatının (İKT) İqtisadi, Mədəni və Sosial Məsələlər üzrə Komissiyasının sessiyasında "Dialoq və Əməkdaşlıq Uğrunda İslam Konfransı Gənclər Forumu" (DƏ-İKGF) haqqında qətnamə layihəsi yekdilliklə qəbul olunub.

Bu barədə APA-ya DƏ-İKGF-nin İstanbul baş qərargahından məlumat verilib. Qeyd edək ki, adıçəkilən komissiyanın yüksək rəsmi şəxslər səviyyəsində hər il keçirilən sessiyasında İKT ölkələrinin Xarici İşlər Nazirlər (XİN) Şurasının sessiyasının gündəliyinə daxil olunan sənədlər müzakirə edilir.

Bu il İKT XİN Şurasının sessiyası iyunun sonunda Qazaxıstanın paytaxtı Astana şəhərində keçiriləcək.

DƏ-İKGF nümayəndəliyinin rəhbəri, Forumun baş katibi, səfir Elşad İsgəndərov bildirib ki, qətnamənin vacib maddələrindən biri "20-ci əsrdə İKT ölkələrində humanitar faciələr üzrə Anım Günü proqramı" çərçivəsində "Xocalıya Ədalət" beynəlxalq kampaniyasına həsr olunub.

Xüsusilə, qətnamə layihəsi dövlət üzvlərini, həmçinin İKT institutlarını Xocalıya Ədalət və Xocalı kütləvi qırğınının insanlıq əleyhinə yönəlmiş cinayət kimi, həm milli zəmində, həm də beynəlxalq səviyyədə tanınması istiqamətində öz fəaliyyətlərini gücləndirməyə çağırır.

Qətnamə layihəsində, həmçinin, BMT-nin Sivilizasiyaların İttifaqı uğrunda Alyansı prosesində gənclərin rolunun güclənməsi sahəsində, xüsusilə DƏ-İKGF-nin İKT tərəfdaşı kimi bu il 9-11 aprel tarixində Bakı şəhərində təsis edilmiş Sivilizasiyaların İttifaqı Uğrunda Qlobal Gənclər Hərəkatının yaradılmasında Forumun oynadığı rola yüksək qiymət verilib.

E. İsgəndərov sessiyada çıxış edərək 2007-ci ildə Azərbaycanın birinci xanımı, UNESCO və İSESCO-nun xoşməramlı səfiri, Heydər Əliyev Fondunun prezidenti Mehriban Əliyevanın təşəbbüsü ilə 2007-ci ilin noyabr ayında Bakı şəhərində təsis edilən hərəkatın davamı olaraq Qlobal Gənclər Hərəkatının əhəmiyyətindən, Forumun müsəlman gəncliyin inkişafına yönəlmiş fəaliyyətindən, o cümlədən islamofobiya ilə mübarizədə Forumun aparıcı beynəlxalq təşkilatlarla əməkdaşlığından bəhs edib.