Bu barədə məlumatı polisə qadının qızı açıqlayıb

Astara rayonu Təngərud kənd sakini Zinyət Yasin qızı Məlikova Astara rayon prokurorluğuna müraciət edərək anasının ölüm səbəbini açıqlayıb. O anasının ölümündə atası Yasin Məlikovu təqsirli bilib. Belə ki, atası mütəmadi olaraq anasını döyüb, işgəncələr verirmiş. Axırıncı dəfə isə evdən qovulan ana məcburiyyət qarşısında ata ocağına gedib və elə həmin evdə də vəfat edib. Onun övladları isə bu vaxta qədər atalarından qorxduqlarından bu məsələni heç kimə danışmağa cəsarət etməyiblər.

Araşdırmalardan bəlli olub ki, ailədə zorakılıq sadə səbəb üzündən baş verib. Belə ki, Yasinin həyat yoldaşına tutduğu irad çox vaxt yeməyin gec gətirilməsi və ya həyat yoldaşının ağbirçək anasına göstərdiyi qayğı üstündə olub. Təqsirləndirilən şəxs anasına arvadı tərəfindən göstərilən qayğıya hər dəfə etirazını bildirib və elə buna görə qadını döyüb. Ən dəhşətlisi isə bütün bu söhbətlərin baş verən olayların həddi buluğa çatmış uşaqların gözləri qarşısında baş verməsi olub.

Tibbi ekspertiza mərhumun bədənində müxtəlif xəsarətlərin olduğunu təsdiqləyib. Dəqiq rəy alındıqdan sonra Yasin Məlikov barasində şübhəli şəxs qismində həbs qəti imkan tədbiri seçilib.

Qeyd edək ki, təqsirləndirilən şəxs qismində istintaq cəlb olunan 49 yaşlı Yasin Məlikov kəndin mollası olub.