Azərbaycanın Birləşmiş Ərəb Əmirliklərindəki (BƏƏ) səfiri Elxan Qəhrəmanovun təşəbbüsü ilə BƏƏ baş nazirinin müavini, daxili işlər naziri Şeyx Seyf bin Zayed Əl Nəhyan ilə görüş keçirilib.

Səfirlikdən APA-ya verilən məlumata görə, görüş zamanı, Şeyx Seyf bin Zayed Əl Nəhyan səfirə iki dost ölkə arasında münasibətlərin daha da möhkəmləndirilməsi missiyasını həyata keçirməsi ilə bağlı müvəffəqiyyət arzulayıb, BƏƏ tərəfindən bu sahədə lazımi əməkdaşlığın və yardımın göstəriləcəyinə əminliyini ifadə edib. Söhbət əsnasında, Azərbaycan ilə BƏƏ arasında siyasi və iqtisadi münasibətlərin hazırkı vəziyyəti ilə bağlı fikir mübadiləsi aparılıb.
BƏƏ xarici ticarət naziri, BƏƏ iqtisadiyyat naziri və BƏƏ xarici işlər nazirinin Azərbaycanda rəsmi səfərdə olduğu qeyd edilib, bu kontekstdə Şeyx Seyf bin Zayed Əl Nəhyanın artıq Azərbaycana rəsmi şəkildə dəvət edilməsi xatırladılıb, bu səfərin ikitərəfli əlaqələrin daha da inkişaf etdirilməsi işinə öz töhfəsini verəcəyi vurğulanıb.

Görüş zamanı, həmçinin, Azərbaycan Fövqəladə Hallar Nazirliyi ilə BƏƏ Daxili İşlər nazirliyi arasında fövqəladə halların idarə edilməsi sahəsində Anlaşma Memorandumunun imzalanması ilə bağlı məsələlər müzakirə olunub, sözügedən sənədin ikitərəfli əməkdaşlıq əlaqələrinin inkişafı, eləcə də, tərəflər arasında təcrübə mübadiləsinin aparılması və ayrı-ayrı sahələr üzrə qarşılıqlı yardımın göstərilməsi baxımından əhəmiyyəti qeyd edilib.
Görüşün sonunda artıq BƏƏ-nin Azərbaycanda səfirinin təyin olunmasının iki ölkə arasında münasibətlərin daha da yaxınlaşmasına xidmət edəcəyi bildirilib.