"Biz Azərbaycan vətəndaşının dini inancından öz siyasi, iqtisadi və digər maraqları naminə istifadə etmələrinə heç kimə imkan verməyəcəyik. Son zamanlar bəzi daxili və xarici dini, qeyri-dini qurumlar Azərbaycanda məhzəbçilik, məhzəbçilik üzərində dini qarşıdurma, insanları bu və ya digər dini tədbirlərə, təriqətlərə sövq etmək məqsədi ilə müəyyən aksiyalar keçiriirlər. Əlbəttə, biz dövlət olaraq buna göz yuma bilmərik".

Bu fikirləri Prezident Aparatının ictimai siyasi şöbəsinin müdiri Əli Həsənov bildirib. Azərbaycanda dini tolerantlığın olduğunu və dövlətin bununla fəxr etdiyini bildirən Ə. Həsənov bütün dünya ölkələrində bu təcrübəni təbliğ etdiklərini qeyd edib: "Amma bəzi radikal cərəyanlar bu tolerantlıqdan sui-istifadə edərək, fəaliyyətlərini genişləndirməyə, cəmiyyətdə bölücülük yaratmağa çalışırlar.

Təbii ki, biz buna imkan verə bilmərik, onlara qarşı tədbirlər görülür və bundan sonra da görüləcək. Etiraf etməliyik ki, belə cərəyanların fəaliyyəti Azərbaycanda getdikcə genişlənməkdədir. Ayrı-ayrı dini təriqətlər, xüsusən də onların radikal hissəsi insanların dini inancından sui-istifadə edərək, onların fəaliyyətinə, həyat tərzinə ciddi təsir göstərməyə çalışırlar. Son zamanlar onların bəziləri hətta silahlanmağa, dəstələr şəklində fəaliyyət göstərməyə cəhd ediblər. Bütün bunların qarşısı hüquq-mühafizə orqanları tərəfindən alınıb, belə cəhdlər olsa yenə də qarşısı alınacaq.

Dünyəvi dövlətdə dini azadlıq və tolerantlıq o demək deyil ki, ayrı-ayrı siyasi-ictimai təşkilatlar insanları dini inancına görə təşkilatlandırıb, bu və ya digər qanunda nəzərdə tutulmayan, həmçinin dövlətçiliyə, milli birliyə, vətəndaş birliyinə xələl gətirən aksiyalara cəlb edə bilər". Ə. Həsənov dünyəvi dövlətlərdə belə tədbirlərin qarşısının alındığını qeyd edib. Onun sözlərinə görə, hər bir insan öz dini inancı qarşısında sərbəstdir: "Lakin dünyəvi dövlətin bir tələbi də ondan ibarətdir ki, dövlət idarələrinə, təhsil müəssisələrinə dini formalar, dini geyim və digər dini mənsubiyyət göstərən əlamətlər daşınmır. Hazırda dini duruma nəzarət olunur və bu sahəyə məsul olan Dövlət Komitəsi müəyyən işlər görür".