NATO-nun Liviyadakı hərbi əməliyyatlarında dəniz hərəkatına ən böyük dəstəyi Türkiyə verəcək

APA-nın Türkiyə mətbuatına istinadən verdiyi məlumata görə, NATO-nun hərbi müdaxiləsinin tərkibində bu günə qədər 16 döyüş və 1 sualtı gəmisi əməliyyatlara dəstək vermək üçün hərəkata qoşulub. Türkiyə tərəfindən isə dəniz əməliyyatlarına 5 müxtəlif funksiyalı hərbi gəmi, 1 sualtı gəmi qoşulacaq. Hərbi missiyanın qərargah və nəzarət funksiyası isə İtaliya dəniz qüvvələrinə məxsus gəmidən həyata keçiriləcək. Türkiyə ilə yanaşı, dəniz əməliyyatlarında Kanada, İngiltərə, Yunanıstan, İtaliya və ABŞ-dan hər birindən 1 gəmi iştirak edəcək. Sualtı əməliyyatlarda 3 sualtı gəmi isə Türkiyə, İspaniya və İtaliyadan olacaq. Məlumatda qeyd olunub ki, NATO sözçüsü Oana Lungescu isə hava əməliyyatları ilə bağlı isə NATO-ya üzv ölkələr arasında hələ müzakirələrin aparıldığını deyib.
Türkiyə Hərbi Dəniz Qüvvələrinin komandanı Uğur Yiğit isə bildirib ki, Türkiyəyə məxsus iki gəmi artıq Liviyanın sahillərindədir, daha iki hərbi gəmi və sualtı qayığın yola düşməsi üçün hazırlıqlar tamamlanmaq üzrədir.
Türkiyənin iqtidarda olan Ədalət və İnkişaf Partiyasının parlamentdəki deputat qrupunun rəhbəri Bekir Bozdağ deyib ki, Türkiyə Silahlı Qüvvələrinin Liviyada keçirilən hərbi əməliyyatlarda iştirakını təsdiqləyən sənəd bu gün Türkiyə Böyük Mİllət Məclisində müzakirə olunacaq.