Türkiyə Xarici İşlər Nazirliyi yanında Strateji Araşdırmalar Mərkəzinin rəhbəri Bülənt Aras Azərbaycana səfəri çərçivəsində Ağdam rayonunda olub

APA-nın Qarabağ bürosunun xəbərinə görə, türk diplomatlarını Qaçqın və Məcburi Köçkünlərlə İş Üzrə Dövlət Komitəsi və Xarici İşlər Nazirliyinin əməkdaşları müşayiət ediblər.

Qonaqlar torpaqlarımızın ərazi bütövlüyü uğrunda şəhid olan soydaşlarımızın xatirəsinə ucaldılmış abidə kompleksini, Heydər Əliyevin heykəlini ziyarət ediblər.

Türkiyəli diplomatlar Ağdam Rayon İcra Hakimiyyətində rayon rəsmiləri ilə görüşəndən sonra məcburi köçkünlər üçün salınmış qəsəbədə olublar.

Ərazisinin 77 faizi işğal altında olan Ağdam rayonunun sakinləri son 20 ildə yaşadıqları çətinliklərdən və dünyanın Qarabağ probleminə ikili standartlarla yanaşmasından danışıblar.

Türkiyə SAM-ın rəhbəri bildirib ki, münaqişədən 14 il yox, hətta 140 il ötsə belə, Türkiyə Qarabağ münaqişəsinin ədalətli və Azərbaycanın ərazi bütövlüyü çərçivəsində həlli üçün əlindən gələni əsirgəməyəcək: "Biz burada qardaşını, nişanlısını, oğlunu itirən insanlar gördük. Biz Türkiyə olaraq, Qarabağ probleminin dünyanın diqqət mərkəzində saxlanması üçün nə lazımdırsa, türk diplomatları olaraq, onu da həyata keçirməyə çalışırıq".

B. Aras jurnalistlərlə söhbətində bildirib ki, Azərbaycana səfərdə əsas məqsəd Türkiyə Xarici İşlər Nazirliyi Strateji Araşdırmalar Mərkəzi ilə Azərbaycan Prezidenti yanında Strateji Araşdırmalar Mərkəzi ilə əməkdaşlığı genişləndirməkdir.