Halal (şəriətə görə icazə verilən) turizm sənayesinin və İslam Konfransı Təşkilatına üzv ölkələrində istirahətin inkişafı ilə məşğul olacaq Beynəlxalq islami turizm şirkəti yaradılıb. Bu, müsəlman ölkələrində turizmin inkişafı ilə bağlı Ciddə şəhərində keçirilən I Forumun yekunu olmuşdur.

"İslam ölkələrinin turizm inteqrasiyası yolunda" adlı Forumu Səudiyyə Ərəbistanının turizm üzrə Ali Komitəsi, İslam ticarət-sənaye Palatası və Səudiyyə Ərəbistanının ticarət-sənaye Palatası Şurası birgə təşkil etmişdi. Yeni şirkətin üzv-təsisçilərinin siyahısına Səudiyyə Ərəbistanı, Qətər, İran, Sudan, Pakistan və Azərbaycanın turizm şirkətləri daxildir. Şirkətin ilkin kapitalı 100 milyon ABŞ dolları həcmindədir. Layihə yeni üzvlər və investisiyalar üçün açıqdır.

Səudiyyə Ərəbistanının daxili işlər naziri və turizm üzrə ali komitəsinin direktorlar şurasının sədri şahzadə Naif tərəfindən çərşənbə axşamı günü açılan Forum müsəlman ölkələrində turizmin inkişafı problemlərinə həsr olunmuşdu.