"Bildiyiniz kimi, hal hazırda ölkədə vəhabi bəhanəsi ilə inanclı insanlara qarşı psixoloji təzyiqlərə başlamışdır. Bu təzyiqlərin görünən və görünməyən tərəfləri vardır. Görünməyən tərəflərindən biri də, hicablıların ictimaiyyətdə artmasından qorxaraq yeni qanun layihəsi hazırlığı haqqında KİV-ləri ilə ictimaiyyətə sızdırmaqdır.

Hicabın guya dövlət təməllərini sarsıdacaq fikirləri, hicablıların məktəblərə buraxılmaması fərziyyələri, hicaba geriyə addım kimi ağılsız sözlər məhs İslam dini və inanclı insanlara qarşı düşmənçilik və soyuq münasibət kimi görünür". Bu barədə Milli-Mənəvi Dəyərlər İctimai Birliyinin yaydığı bəyanatda bildirilir. Bəyanatda daha sonra deyilir:

"Ölkədə baş verən pozğunçuluq milli-mənəvi dəyərlərin tapdalanması və buna şərait yaratmaq da İslam dininin inkişafına maneə yaratmaq üçün atılan addımlardır.

Orta məktəb və Ali Məktəblərdə hicablılara qarşı edilən təzyiqlərə son qoyulmasını bu millətin nümayəndəsi, ölkənin vətəndaşı kimi əlaqədar orqanlardan tələb edirik.

Vəzifə səlahiyyətlərini aşan dövlət məmurlarına da ölkə qanunlarına tabe olmağa çağırırıq.

Əks təqdirdə Milli-Mənəvi Dəyərlər İctimai Birliyi və digər Təşkilatlar buna qarşı qanunlara müvafiq olaraq sərt tədbirlər həyata keçirəcək".

İslam-Azeri-yə bununla bağlı münasibət bildirən MMDİB-nin sədri Abgül Suleymanov Ölkədə İslama olan müxtəlif təzyiqlərə xüsusən də hicaba olan qadağaya son qoyulmasını istəyib: "Ölkədə İslama olan müxtəlif təzyiqlərə xüsusən də baş örpəyinə olan qadağaya son qoyulsun. Baş örpəyinə olan təzyiqlər biz inanclı və vicdanlı müsəlmanların səbrinin daşmasına səbəb ola bilər. Bizə verilən məlumata əsasən Sumqayıt şəhər universitetindən 7 hicablı xanım rəsmi qovulub. Mən məmurların çirkin və rəzil özbaşnalığına təəccüb etmirəm. Onlar yarasaya oxşayırlar necə ki, yarasa qaranlıq və zülmətə qaçır, bəzi məmurlar da nur və işıqdan qaçırlar.

Əgər hicaba qarşı qadağalara son verilməsə biz Azərbaycan dindarları adından İslam Konfransı Təşkilatına rəsmi şikayət məktubu yazacağıq. Əgər bu özbaşnalıq davam etsə bizə vəzifə olacaq ki, etirazlara başlayaq. Biz sivil yollarla nazirlik,əlaqədar təşkilatlar qarşısında mitinqlər təşkil edəcəyik".