Azərbaycan Respublikası prezidenti İlham Əliyevin göstərişi əsasında Misirdə müvəqqəti və daimi əsasda yaşayan azərbaycanlıların təxliyəsi təşkil olunub və göstərişin icrası məqsədilə Azərbaycan Respublikasının Misir Ərəb Respublikasındakı səfirliyində operativ qərargah və qaynar xətt xidməti təşkil olunub, qısa müddət ərzində və operativ şəkildə vətəndaşların toplanması və onların hava limanına çatdırılması həyata keçirilib. Bu barədə APA Azərbaycan Respublikası Xarici İşlər Nazirliyinin mətbuat xidmətinə istinadən məlumat verir.

30 yanvar tarixində "Azərbaycan Hava Yolları" dövlət şirkətinə məxsus təyyarə ilə xüsusi çarter reysi vasitəsilə 23 nəfəri azyaşlı uşaq olmaqla, 103 nəfər azərbaycanlı, o cümlədən N.Qocayevin cənazəsi operativ qaydada və təhlükəsiz şəraitdə vətənə çatdırılıb.

Misirdə siyasi böhranın və qeyri-sabit vəziyyətin davam etməsinə baxmayaraq, Azərbaycan Respublikasının Misirdəki səfirliyi fəaliyyətini və Misirdə qalan Azərbaycan vətəndaşlarının təxliyəsini davam etdirib. Bir çox vətəndaşların səfirlikdə qeydiyyata düşməməsi vətəndaşların toplanması üçün müəyyən çətinliklər yaratsa da, səfirlik mümkün olan bütün vasitələrdən istifadə edərək qeydiyyatda olmayan vətəndaşlarla belə əlaqələrin qurulmasını təmin edib.

30 yanvar tarixində xüsusi reyslə həyata keçirilmiş təxliyə əməliyyatından sonra, 31 yanvar-3 fevral tarixlərində daha 60 nəfər Azərbaycan vətəndaşı Misirdən çıxarılıb, Türkiyənin Qahirədəki səfirliyinin dəstəyi ilə "Türk hava yolları" reysi ilə İstanbul istiqamətinə yola salınıblar. Az sayda olan digər qrup isə Moskva şəhərinə göndərilib. İstanbul və Moskva şəhərlərində isə "Azərbaycan Hava Yolları" şirkətinə məxsus təyyarələrlə vətəndaşlarımız heç bir xərc tələb olunmadan vətənə çatdırılıblar.

Ümumiyyətlə, bu müddət ərzində təxliyə olunan şəxslər arasında Azərbaycan vətəndaşları ilə bərabər, milliyyətcə azərbaycanlı və yaxud qarışıq ailələrin nümayəndələri, amma Rusiya və digər ölkələrin vətəndaşları olan şəxslər də olublar.

Misirdəki qeyri-sabit və təhlükəli vəziyyətə baxmayaraq, Azərbaycan Respublikasının Misir Ərəb Respublikasındakı səfirliyi məhdud rejimdə olsa da fəaliyyətini davam etdirir və müəyyən səbəblərə görə hələ də bu ölkədə qalan vətəndaşlara yardım göstərməkdə davam edir.