Azərbaycan Milli Məclisinin 2011-ci il yaz sessiyasının bu gün keçirilən ilk iclasında millət vəkilləri müxtəlif təkliflərlə çıxış ediblər

APA-nın məlumatına görə, deputat Fazil Mustafa çıxışında spiker Oqtay Əsədovdan hüquq müdafiəçisi Novella Cəfəroğlunun 70 yaşı münasibəti ilə prezident təqaüdü alması və yaxud hansısa dövlət mükafatı ilə təltif olunması üçün dövlət rəhbərliyi qarşısında məsələ qaldırmağı xahiş edib.
Millət vəkili Azay Quliyev isə İranın Azərbaycanın daxili işlərinə qarışmasını sərt tənqid edib. O eyni zamanda Təbrizdən Ermənistana neft kəmərinin çəkilməsini, Ermənistanın bu ölkə tərəfindən dəstəklənməsinin işğalçı dövlətə açıq dəstək və havadarlıq olduğunu bəyan edib.
Millət vəkili Siyavuş Novruzov isə ATƏT-in seçkilərlə bağlı hesabatını, həmçinin müxalifət partiyaları və bir sıra QHT-lərin yaratdığı İctimai Palatanın fəaliyyətini tənqid edib: "İctimai Palata deyilən qurumlar bəzi yerlərdə təmizlik işləri ilə məşğul olur, bələdiyyələrə yardım edirlər. Amma siyasi fəaliyyətlə məşğul olmurlar". S. Novruzov Fazil Mustafanın hüquq müdafiəçisinin təltif olunması barədə təklifinə münasibət bildirib: "Fikirlərimi konkret adınızı çəkdiyiniz adama şamil etmirəm. ona şamil etmirəm. Amma bu hüquq müdafiəçilərinin fəaliyyətinin nəticəsidir ki, ölkəmiz haqqında belə fikirlər yaranır. Onlar hansısa bir müəllimi və ya həkimin hüquqlarını müdafiə ediblərmi?"
Spiker Oqtay Əsədov isə deyib ki, AŞ PA-da Azərbaycandan daha çox iştirak edən siyasi partiya və QHT yoxdur: "Ora gedənlərin də bir nəfərindən müsbət fikir eşitmirsən. Biz bunu görmüşük. Gərək belə məsələlərə diqqət yetirək".
Deputat Vahid Əhmədov 20 il əvvəl Azərbaycanın müstəqilliyinə səs verən insanların xatırlanmasını, onların hüquqlarının müdafiəsi ilə bağlı ayrıca tədbirlərin həyata keçirilməsinin vacibliyini vurğulayıb.
Deputat Zahid Oruc və Fəzail Ağamalı çıxışlarında İranın Azərbaycanın daxili işlərinə qarışmasını tənqid ediblər. Z. Oruc Azərbaycan vətəndaşlarını İrana səfər etməməyə çağırıb. F. Ağamalı isə qeyd edib ki, İrandakı mövcud molla rejimi Azərbaycana qarşı düşmənçilik siyasəti yürüdür: "Narkotiklərin Azərbaycana ötürülməsindən, müxtəlif proqramların pozuculuq siyasətindən tutmuş Ermənistanı dəstəklənməsinə qədər bu düşmənçilik siyasəti yeridilir. Mən təklif edirəm ki, Azərbaycan tərəfi beynəlxalq təşkilatlar qarşısında İrandakı azərbaycanlıların hüquqlarının müdafiəsi məsələsini qaldırsın. İranın Qum və digər şəhərlərində oxuyub gəlmiş azərbaycanlıların fəaliyyəti araşdırılsın".
Vitse-spiker Ziyafət Əsgərov isə siyasi məhbuslarla bağlı məsələnin müzakirəsindən danışıb. Vitse-spiker deyib ki, Avropanın heç bir hüquqi sənədində, Cinayət Məcəlləsində siyasi məhbus anlayışı yoxdur: "Araşdırmalar zamanı məlum olur ki bu məsələni beynəlxalq təşkilatların sənədlərinə də qəsdən salmırlar. Bununla başqa ölkələrin daxili işlərinə qarışmaq istəyirlər. Bu qədər insanın daxili işinə qarşı qarışmaq olmaz. Biz deyirik yoxdur, siz deyirsiniz var. Ortada bir hakim olmalıdır…"
Z. Əsgərov Avropa Şurasında Yaxın Şərqdə xristianların öldürülməsinə dair müzakirələri də tənqid edib: "Azərbaycanda bir milyon müsəlman ev-eşiyindən didərgin düşüb. Ay Avropa, niyə bu məsələni qaldırmırsınız? Bu, mağara mədəniyyətidir. Yaxın Şərqdə qırılan insandır, Əfqanıstanda qırılan insan deyil? Nə qədər gizlətmək olar? Axı nə qədər bəzi səfirliklər burada agentura rolunu oynayacaq?"
Millət vəkili İqbal Ağazadə isə deyib ki, Misir xalqının qarşı çıxdığı, diktator Hüsnü Mübarəkin Bakıda heykəli var: "Buna rəğmən uzun illərdir yer ayrılmasına baxmayaraq, hələ də Bakıda Məmməd Əmin Rəsulzadənin abidəsi ucaldılmayıb". Deputat Tarif Şurasının ötən gün bəzi xidmətlər üzrə tarifləri artırmasının düzgün addım olmadığını və bunun ölkədə əhalinin sosial vəziyyətini daha da pisləşdirəcəyini vurğulayıb.
Millət vəkili Məlahət İbrahimqızı isə O. Əsədovdan millət vəkilləri adından İran parlamentinə etiraz məktub göndərilməsini xahiş edib.